Էդվարդ Սանդոյանը՝ Հայ-ռուսական համալսարանի ռեկտոր
Հայ-Ռուսական համալսարանում մայիսի 12-ին տեղի է ունեցել Համալսարանի ընդհանուր ժողովը (Կոնֆերանսը)՝ ռեկտորի ընտրության օրակարգով։
ՀՌՀ մամուլի ծառայությունից հայտնում են, որ ՀՌՀ-ի պրոֆեսորադասախոսական, վարչական կազմերից և ուսանողներից ընտրված պատվիրակները փակ գաղտնի քվեարկությամբ (216 կողմ և 147 դեմ ձայների հարաբերակցությամբ) տ.գ.դ., պրոֆեսոր Էդվարդ Սանդոյանին ընտրել են ռեկտորի պաշտոնում: Մինչև քվեարկության մեկնարկը՝ ՀՌՀ ռեկտորի մեկ այլ թեկնածու, փ.գ.դ., պրոֆեսոր Պարգև Ավետիսյանն ինքնաբացարկ էր հայտնել։
«Գործող ընթացակարգի համաձայն՝ ՀՌՀ-ի կոնֆերանսի կողմից ընտրված ռեկտորին պետք է հաստատեն համալսարանի հայաստանյան և ռուսաստանյան համահիմնադիրները։ Ինչպես ավելի վաղ տեղեկացրել էինք, հայկական կողմն արդեն հայտնել է իր պատրաստակամությունը հաստատել Կոնֆերանսի կողմից ընտրված ցանկացած թեկնածուին։
Հիշեցնենք, որ Հայ-Ռուսական համալսարանի հայաստանյան համահիմնադիրը՝ ի դեմս ՀՀ ԿԳՄՍ նախարարի, համապատասխան գրություններով դիմել էր ռուսաստանյան համահիմնադրին և համալսարանի գործող ռեկտոր Արմեն Դարբինյանին՝ հայտնելով նաև ընտրության համար նախընտրելի թեկնածուների անունները: Դրանք էին՝ տ.գ.դ., պրոֆեսոր Էդվարդ Սանդոյանը և փ.գ.դ., պրոֆեսոր Պարգև Ավետիսյանը: Իսկ համալսարանի երկարամյա ռեկտոր, կոլեկտիվի միասնական թեկնածու, ՀՀ նախկին վարչապետ, պրոֆեսոր Արմեն Դարբինյանը նախօրոք որոշում էր կայացրել չառաջադրվելու գալիք ընտրություններում՝ ելնելով սեփական առաջնահերթություններից:
Համալսարանի Հայաստանյան համահիմնադիրը՝ արձագանքելով ուսանողության և կոլեկտիվի բազմահազարանոց անդամների Հանրագրին, ինչպես նաև խորը ուսումնասիրության ենթարկելով Համալսարանի գործունեության իրավակարգավորումները, եկել էր այն եզրակացության, որ ռեկտորի ընտրության օրակարգով Համալսարանի Ընդհանուր Ժողովի անցկացումն այլընտրանք չունի, քանի որ ոչ Համալսարանի կանոնադրությամբ, ոչ միջպետական համաձայնագրով սահմանված չեն ժամանակավոր պաշտոնակատարի նշանակման դրույթներ»,- հայտնում են ՀՌՀ-ից։
Նշենք, որ ՀՀ և ՌԴ տնտեսագիտության դոկտոր, պրոֆեսոր, պետական-հասարակական գործիչ, ՀՀ Ֆինանսների և էկոնոմիկայի նախկին նախարար (1998-1999), Հայաստանի մանկավարժահոգեբանական գիտությունների ակադեմիայի իսկական անդամ (Ակադեմիկոս), նախագահության անդամ Էդվարդ Սանդոյանը 2004 թվականի հունիսից 2012 թվականի մայիս եղել է Ռուս-Հայկական (սլավոնական) համալսարանի կրթության զարգացման գծով պրոռեկտոր։
2007 թվականի հունիսից՝ Ռուս-Հայկական (սլավոնական) համալսարանի Էկոնոմիկայի և ֆինանսների ամբիոնի պրոֆեսոր, 2009 թվականի սեպտեմբերից՝ Ռուս-Հայկական (սլավոնական) համալսարանի Բիզնես դպրոցի ղեկավար, 2012 թվականի մայիսից՝ Ռուս-Հայկական (սլավոնական) համալսարանի տնտեսագիտության և բիզնեսի ինստիտուտի տնօրեն, ինստիտուտի գիտական խորհրդի նախագահ։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
