Ձեր վստահելի աղբյուրը

«ԵՄ դիտորդները հաշվետվությունները Հայաստանին չեն ներկայացնում, ոչ էլ Ադրբեջանին, այլ հաղորդում են Բրյուսել»,- լրագրողներին ասաց Հայաստանում Եվրոպական միության պատվիրակության ղեկավար, դեսպան Անդրեա Վիկտորինը։

Նա նշեց, որ քանի որ առաքելությանը միացած են նաև ՊՆ սպաներ, հայկական կողմը հստակ արձանագրում է իրադարձությունները։

«Ինչ վերաբերում է վերջերս տեղի ունեցած դաժանություններին, եթե խոսքը Սոթքի մասին է, նրանք այնտեղ ներկա չեն եղել, բայց սահմանին բավականին զգալի երկայնքով ներկա են։

«Կա շաբաթական կտրվածքով իրականացվող օրակարգ։ Այսինքն նրանք ցանկություն չունեն հայտնվելու այնտեղ, որտեղ ինչ-որ բան տեղի է ունենում, նրանք իրականացնում են սահմանի մշտադիտարկում և արձանագրում այն, ինչ տեսնում են, բայց դա չի նշանակում, որ ավտոմատ կերպով կարող են հայտվնել ինչ-որ մի կետում, որտեղ մի բան տեղի է ունենում», - ասաց Ա. Վիկտորինը։

Լրագրողի հարցին՝ արդյո՞ք եթե էսկալյացիա է տեղի ունեցել, չպետք է այդ կետում հայտնվեն, դեսպանն ասաց, որ նրանք ավելի ուշ՝ դեպքերից հետո, այդ հնարավորությունը ստացել են։

«Նաև պետք է հաշվի առնել, որ հայկական կողմն է առաջին հերթին պատասխանատու մշտադիտարկողների, դիտորդների անվտանգության ապահովման համար։ Այսինքն, կարող է լինել նաև իրավիճակ, երբ դիտորդները հրաժարվեն կոնկրետ կետ գնալուց։

Բայց գնացել են, գնահատական տվել և ուղարկել ուղիղ Բրյուսել, ոչ թե մեզ», - ասաց Ա. Վիկտորինը։

Նա նշեց, որ հստակ համաձայնագիր կա, որ սա քաղաքացիական, ոչ զինված առաքելություն է, որի հիմնական նպատակն է  իրապես մշտադիտարկման միջոցով լինել Հայաստանի ու Ադրբեջանի սահմանին, այստեղ որևէ ռազմական բաղադրիչ չկա։ 

«Սա մի որոշում է, որը կայացվել է  վարչապետ Փաշինյանի կողմից, և ես կարող եմ միայն գնահատել նրա խիզախությունը և հանձնառությունը Հայաստանում այսպիսի առաքելություն ապահովելու համար՝ բազմաթիվ քննադատող ձայների առկայությամբ»,- ասաց Ա. Վիկտորինը։  

Նշենք, որ ասուլիսից հետո ԵՄ պատվիրակությունը պարզաբանում է տարածել՝  ներկայացնելով ԵՄ քաղաքացիական առաքելության (EUMA) դիտորդների վերաբերյալ հարցի պատասխանի ճիշտ թարգմանությունը։ Նշենք նաև, որ ասուլիսի ընթացքում թարգմանությունն ապահովված էր։ 

«Զեկույցները չեն տրամադրվում Հայաստանին։ Դրանք չեն տրամադրվում Ադրբեջանին, և չեն տրամադրվում Հայաստանին։ Սակայն, քանի որ առաքելությանն ուղղորդում են ՀՀ ՊՆ սպաներ, հայկական կողմը լավատեղյակ է, թե ինչ են նրանք [դիտորդները] տեսնում։ Բնական է որ, նրանք չեն կարող լինել ամենուր։ Ուստի, նրան կարող են միայն դիտորդություն իրականացնել և այնուհետև զեկուցել Բրյուսել: Սակայն նրանք չեն կարող զեկուցել այն, ինչ չեն տեսել։ Ինչը բավականին տրամաբանական գործոն է։ Նրանք ներկա չեն եղել «հողի վրա» վերջին ներխուժման և բախումների ժամանակ․․․ երբ ներխուժումը տեղի ունեցավ։ Սահմանը բավականին երկար է, և գոյություն ունի պարեկության գրաֆիկ։ Միաժամանակ, նպատակն այն չէ, որ նրանք պետք է ներկա լինեն, երբ տեղի են ունենում պատահարներ։ Նրանք դիտորդություն են իրականացնում սահմանի երկայնքով և տեսնում են այն, ինչ տեղի է ունենում սահմանի շուրջ, բայց դա չի նշանակում, նրանք հենց այն վայրում են, որտեղ տվյալ պահին ինչ որ բան է տեղի է ունենում»։