Ձեր վստահելի աղբյուրը

Հայաստանը կոնյակի երկիր է։ Սա կարգախոս ու բաժակաճառ չէ, այլ ռեալ իրականությունն արտացոլող նախադասություն։ Ապացույցը տեսնելու համար ուղղակի պետք է շրջել Հայաստանով, դուրս գալ Երևանից։ Օրինակ, հասնել սահմանամերձ Տավուշ և տեսնել լեգենդար ARARAT կոնյակների ամենահեռավոր ակունքը՝ Բերդի մասնաճյուղը։ Մի քանի րոպեում կհասկանաք, որ սա սոսկ մասնաճյուղ չէ, շենք ու սարքավորում չէ։ Մի կողմից կոնյակի ստեղծման կուլտուրա ու էսթետիկա, մյուս կողմից, ըստ էության, արդյունաբերական մուլտիպլիկատիվ էֆեկտի օրինակ դասական սխեմայով՝ բարձրակարգ խաղողագործություն, գյուղատնտեսության զարգացում, սոցիալական խնդրի լուծում։ Արդյունքը՝ այն, ինչ լեգենդար ARARAT կոնյակ են կոչում, միշտ ավանդական ու միշտ ժամանակակից, հայի կենսակերպի անբաժան մաս, որը սերդնեսերունդ է փոխանցվում։

Երևանի կոնյակի գործարանը բացի Արարատի և Արմավիրի մարզերում գործող մասնաճյուղերից, նաև Տավուշի մարզի Բերդ քաղաքում մասնաճյուղ ունի, որն այս տարի նշում է իր հիմնադրման 20-ամյակը։ 20 տարի առաջ բացվելով որպես խաղողի մթերման կետ՝ այսօր Երևանի կոնյակի գործարանի Բերդի մասնաճյուղը համայնքի կարևորագույն վայրերից է, լեգենդար ARARAT կոնյակների պատրաստման ակունքներից մեկը, որտեղ իրականացվում են կոնյակի արտադրության այնպիսի փուլեր, ինչպիսիք են խաղողի մթերումը, թորումը և հնեցումը։

Երևանի կոնյակի գործարանի Բերդի մասնաճյուղի կառավարիչ Գարիկ Վարդանյանը լրագրողներին ներկայացրեց մասնաճյուղի ստեղծման, զարգացման ու գործունեության մանրամասները. «Մասնաճյուղը հիմնվել է 2003 թվականին։ Մինչև 2009 թվականը մթերվել է խաղող, մթերված խաղողից ստացված գինենյութը տեղափոխվել է մեր գործարանի մյուս մասնաճյուղեր։ 2009 թվականին կառուցվել է թորման արտադրամասը։ 2010 թվականին ամբողջությամբ վերազինվել է խաղողի վերամշակման արտադրամասը, հին մամլիչները փոխարինվել են նոր ֆրանսիական մամլիչներով, որոնք հնարավորություն են տվել ստանալ ավելի որակյալ գինենյութ։  2012 թվականին կառուցվել է հնեցման մառանը»։

Երևանի կոնյակի գործարանի Բերդի մասնաճյուղն ունի հիմնական 18 աշխատակից, խաղողի մթերման ժամանակ ևս 18 աշխատակցով  է համալրվում։

Նա նշեց, որ Երևանի կոնյակի գործարանի այս մասնաճյուղի տեղն ընտրվել է մի քանի գործոն հաշվի առնելով. տարածաշրջանում ցրտահարության վտանգ չկա, կլիման այստեղ մեղմ է, խաղողի որակը, օգնել սահմանամերձ բնակավայրերի բնակիչներին։

«Գտնվելով սահմանամերձ շրջանում՝ Երևանի կոնյակի գործարանի ղեկավարությունն այս մասնաճյուղին մոտենում է այլ կերպ. տարածաշրջանի գրեթե ողջ խաղողը մթերում ենք»,- ասաց Բերդի մասնաճյուղի կառավարիչը։

«Մեր մասնաճյուղը աչքի է ընկնում նաև արտադրվող սպիրտների առանձնահատուկ որակով»,- ընդգծեց Գ. Վարդանյանը։

Երևանի կոնյակի գործարանի արտադրության տնօրեն Համլետ Անտոնյանն ասաց, որ այսօր Երևանի կոնյակի գործարանի Բերդի մասնաճյուղը դարձել է լեգենդար ARARAT կոնյակների հեռավոր ակունքներից մեկը. «Դեռևս 20 տարի առաջ ոչ մի բանով աչքի չընկնող այս վայրում ստեղծվեց մի գործարան, որն այսօր, կարելի է ասել, լիովին դարձել է լեգենդար ARARAT կոնյակների ակունքներից մեկը։ 20-ամյա գիտական, հետևողական, անձնվեր աշխատանքի արդյունքում Երևանի կոնյակի գործարանի Բերդի մեր մասնաճյուղը դարձել է այս տարածաշրջանի այցեքարտերից մեկը»։

Բերդի համայնքապետ Աստղիկ Հակոբյանի խոսքով, արդեն 20 տարի է այս գործարանը խթանում է գյուղատնտեսության, հատկապես խաղողագործության զարգացմանը տարածաշրջանում, նպաստում է  համայնքի խաղողագործներն ավելի շահագրգռված մոտեցում ունենա դեպի այս հին ու լավ ավադույթը՝ խաղողագործությունը։

«Գործարանը պայմանագիր ունի տարածաշրջանի բոլոր խաղողագործների հետ, ոչ մի կիլոգրամ խաղող դուրս չի մնում։ Դա նպաստում է, որ խաղողագործները հեռահար նպատակներ ունենան»,- ասաց Ա. Հակոբյանը։

Երևանի կոնյակի գործարանի Բերդի մասնաճյուղում հոբելյանական տարվա առիթով կազմակերպված ընդունելությանը ներկա էին մասնաճյուղի հետ պայմանագիր կնքած խաղողագործների մի մասը, գործարանի աշխատակիցները, համայնքի ղեկավարն ու համայնքի այլ ներկայացուցիչներ։

Գարիկ Վարդանյանն իր երախտագիտությունը հայտնեց մասնաճյուղի աշխատակիցներին, որոնց աշխատանքի շնորհիվ է նաև Երևանի կոնյակի գործարանի կոնյակներն իրենց առաջնային տեղն ու դերը պահում  միջազգային ասպարեզում, շնորհակալություն հայտնեց ներկա խաղողագործներին համագործակցության համար։

«2023 թվականը շատ խորհրդանշական է մեզ համար։ 2003 թվականին սովորական թվացող այս վայրը 20 տարիների ընթացքում վերածել է մեր քաղաքի, մեր համայնքի ամենակարևոր, ամենաճանաչված վայրերից մեկի, դարձել է լեգենդար ARARAT կոնյակների ամենահեռավոր ակունքը»,- ընդունելության ժամանակ ասաց նա։

Հոբելյանական տարվան նվիրված միջոցառումների մեկնարկը տրվեց Երևանի կոնյակի գործարանի «Convivial Reunion» մշակութային շարքի հատուկ նախաձեռնությամբ, որի շրջանակներում մայիսի 12-ին ընկերության մասնաճյուղում տեղի ունեցավ «Ցանկապատ» ներկայացման այս թատերաշրջանի առաջնախաղը։

Ստեփան Զորյանի համանուն ստեղծագործության հիման վրա բեմադրված այս ներկայացումը նախորդ տարիներին հանդիսատեսին է ներկայացվել Սաղմոսավանքում և Հայաստանի այլ պատմամշակութային վայրերում՝ հուզական ապրումների վառ գունապնակի ներքո պատմելով առավել քան 100-ամյա իրադարձությունների մասին։ Եվ այդ ամենը ներկայացվեց Տավուշի զարմանահրաշ բնության բնական դեկորների ներքո։

«Երևանի կոնյակի գործարանի Բերդ մասնաճյուղի 20-րդ տարեդարձն այս մշակութային ձևաչափով նշանավորելու գաղափարը և այս ջերմ երեկոն համայնքի հետ կիսելը մեր երախտիքն է այն կամքին ու վարպետությանը, տոկունությանն ու բնությանը, որ հյուսում են սահմանամերձ մասնաճյուղի անսահման հմայքը»,- ներկայացման սկզբում ասաց Երևանի կոնյակի գործարանի հասարակայնության հետ կապերի ղեկավար Զարուհի Սարիբեկյանը։

Նա նաև փոխանցեց Երևանի կոնյակի գործարանի գործադիր տնօրեն Սերգեյ Խաչատրյանի  ողջույնը՝ նշելով, որ նա այս պահին երկրում չէ, բայց հենց նրա անմիջական և անձնական մասնակցությամբ է նախաձեռնվել այս ամենը։

«Ցանկապատ» ներկայացման դերակատարներից  Մկրտիչ Արզումանյանը լրագրողների հետ զրույցում շնորհավորեց մասնաճյուղի 20-ամյակը, ասաց, որ Երևանի կոնյակի գործարանի հրավերով են Բերդում։

«Հրաշալի բեմ ստացանք, կազմակերպիչների կողմից ամեն ինչ արվել էր, որպեսզի մեկ վայրկյան անգամ չզգայինք, որ այլ տեղում ենք ներկայացումը խաղում»,- նշեց դերասանը։ Նա ընդգծեց՝ ուրախ են, որ այս թատերաշրջանի մեկնարկը հենց Բերդում են տալիս։

«Դարեր շարունակ կրկնվող թեմա է։ Ներկայացում, որը հասնում է  հանդիսատեսի հոգուն, կարծում եմ թողնում է մի լույս, հաղորդագրություն։ Դա շատ կարևոր է։ Մեր գործը դա է»,- ասաց Մկրտիչ Արզումանյանը։

2018 թվականին մեկնարկած «Convival Reunion» միջոցառումների շարքը միավորում է Երևանի կոնյակի գործարանի աշխատակիցներին մշակութային տարբեր փորձառությունների շուրջ։ Այն իր բնույթով ամփոփում է ընկերության Convivialite գաղափարը՝ աշխատանքի լուսանցքներում միմյանց հետ կիսելու հագեցած և ջերմ պահեր ստեղծելով։

Արդեն իսկ ավանդույթ դարձած միջոցառումների շարքն ունի բազմաժանր մոտեցում. Երևանի կոնյակի գործարանի աշխատակիցները հասցրել են բացահայտել գորգագործության արվեստը՝ Մեգերյան Կարպետում, գեղանկարչության վարպետության վառ եզրերը՝ Մարտիրոս Սարյանի տուն-թանգարանում, հին ձեռագրերի և մատենագրության ժառանգությունը՝ Մատենադարանում, ինչպես նաև Երվանդ Քոչարի քանդակների գաղտնիքները, Արամ Խաչատրյանի ստեղծագործական ուղին և այլն։