Ձեր վստահելի աղբյուրը

Նիկոլ Փաշինյանն Իսլանդիայի մայրաքաղաք Ռեյկյավիկում Եվրոպայի խորհրդի 4-րդ գագաթնաժողովի ժամանակ ունեցած ելույթում ասել է. «2018 թվականին մեր թավշյա հեղափոխությունը Հայաստանին ժողովրդավարական մեծ առաջընթաց բերեց, բայց 2020 թվականի սեպտեմբերին սկսվեց Ադրբեջանի հարձակումը Լեռնային Ղարաբաղի վրա ու Հայաստանը ներքաշվեց պատերազմի մեջ: Շատերն այսօր էլ մտածում են, որ պատերազմի պատճառը Հայաստանի ժողովրդավարական ձգտումներն էին՝ մի տարածաշրջանում, որտեղ ժողովրդավարությունը կարող է կասկածով ընկալվել:2020 թվականի նոյեմբերի 9-ին ես ստորագրեցի հրադադարի մասին եռակողմ հայտարարություն, որը պետական ինստիտուտների՝ Կառավարության և Ազգային ժողովի վրա հարձակման պատճառ դարձավ, որովհետև սանձազերծված պատերազմն, ըստ ամենայնի, նաև Հայաստանում Կառավարության փոփոխության հասնելու նպատակ ուներ»:

Panorama.am-ը ՀՀ նախկին օմբուդսմեն Լարիսա Ալավերդյանին խնդրեց կարծիք հայտնել վերոնշյալ հայտարարության վերաբերյալ:

«Առաջին՝ այն որ վարչապետի պաշտոնը զբաղեցնող անձը հասկանում է, որ այդ պատերազմն իր կյանքով մեկ սեփական խայտառակությունն է, դրա մասին են նախ և առաջ վկայում իր այդպիսի հայտարարություններն, որոնք արել է միչ այդ և այսօր Ռեյկյավիկում:

Երկրորդ՝ այն որ 2020 թվականին Հայաստանում հաստատված ժողովրդավարություն չէր կարող լինել, ակնհայտ է անգամ իր խոսքերով: Եթե մինչ այդ չի եղել ժողովրդավարություն, ապա չկա այդպիսի մի բան, որ երկու տարվա ընթացքում որևէ պետության մեջ հաստատվի ժողովրդավարություն: Այնպես որ, այդ հայտարարությունն ամբողջովին, իր իսկ խոսքերով կարելի է ապացուցել, որ հերթական մանիպուլյացիան է, կամ ուղղակի սուտ է:

Երրորդ՝ որևէ մեկն այդ անձից ավելին չգիտի, թե ինչո՞ւ, ինչպե՞ս սկսվեց պատերազմը և ինչո՞ւ և ինչպե՞ս է այն ավարտվել ոչ թե հոկտեմբերի 10-ին կամ 19-ին, այլ նոյեմբերի 10-ի գիշերը: Այն լավագույնս գիտի այդ անձնավորությունը, նաև՝ թե ինչու է այս ամենի համար եկել այս խումբը, որը քաղաքական ուժ էլ հնարավոր չէ անվանել, քանի որ այն ուղղակի դրածո է աշխարհում և մեր տարածաշրջանում ամենապղտոր, ագրեսիվ և ցեղասպան ուժերի կողմից: Դրա համար այն ուղղակի օգտագործվել և քողարկվել է  ժողովրդի այն  դժգոհությամբ, որը կար, էլ չեմ ասում, որ այն բազմապատկվել է ստի վրա, այն նույն ստի, որը նա նաև այսօր հնչեցրեց:

Ինչո՞ւ է նա նման բան ասում: Ես կարծում եմ, որ Բրյուսելից հետո իր գալը Հայաստան բավականին մեծ հարցեր է առաջացնում, և նա կրկին փորձում է այն նույն կեղտոտ խաղաքարտը խաղացնել, ըստ որի՝ ամեն ինչի մեջ մեղավոր են նախկինները: Դա նման է այն բանին, որ Հիտլերն ուղղակի մեղադրեր Վիլհեմ Կայզերին: Ամեն մի իշխանություն պատասխանատվություն է կրում  իր ժամանակահատվածի համար և եթե իր մեղքերն ապացուցվի, ապա, այո, մեղավորությունն իր վրա է այն ժամանակվա տեղի ունեցածի համար, որը մենք այսօր ֆիքսում ենք որպես այնպիսի պայմանների ստեղծում, որ պատերազմը սկսվի, այնպիսի քաղաքականության վարում, որ հանձնվեն ռազմավարական նշանակություն ունեցող Շուշին և Հադրութը՝ նախկին ԼՂԻՄ-ի շրջանները, որ նույն 2020 թվականի նոյեմբերի 9-ի փաստաթղթում իրարամերժ հոդվածներով գրված է, դրանք էլ ոչնչացվեն և կայնքի կոչվի հայերի նկատմամբ ցեղասպանություն իրականացման թուրք-ադրբեջանական միասնական նպատակները:

Այնպես որ, այստեղ կան հոգեբանական դրվագներ, քանի որ, կրկնում եմ, այդ անձից ավելին որևէ մեկը չգիտի այն բոլոր խորքային մեղքերի և դրանց ծավալի մասին, ինչքան ինքը գիտի և շարունակում է իր անմեղսունակ հնարամտությամբ մեղադրել նախկիններին»,-ասաց Լարիսա Ալավերդյանը: