Ձեր վստահելի աղբյուրը

Ուկրաինային աջակցող արևմտյան երկրները վախենում են, որ Կիևին տրամադրվող ռազմական աջակցությունը շուտով կհասնի իր վերին շեմին՝ հատկապես 2024 թվականի ԱՄՆ նախագահական ընտրությունների շուրջ ստեղծված իրավիճակի ֆոնին։ ՏԱՍՍ-ը գրում է, որ այդ մասին հինգշաբթի հայտնել է բրիտանական Financial Times թերթը՝ վկայակոչելով արևմտյան անանուն պաշտոնյաներին։

Ուկրաինայի դաշնակիցները վախենում են, որ Ռուսաստանի դեմ պայքարին ռազմական աջակցությունը մոտենում է գագաթնակետին, և եվրոպացի բարձրաստիճան պաշտոնյաները ավելի ու ավելի են անհանգստանում, թե ինչպիսին կլինի օգնության հոսքը հաջորդ տարի, քանի որ ԱՄՆ-ը մտնում է պառակտիչ նախագահական քարոզարշավի մեջ:

Պարբերականը նշում է, որ այժմ Վաշինգտոնը Կիևին ռազմական օգնության հիմնական մատակարարն է։ Հարցված ամերիկացի պաշտոնյաներն ասում են, որ ԱՄՆ-ն ունի Կոնգրեսի կողմից հաստատված բավական միջոցներ Կիևին մոտ հինգ ամիս աջակցելու համար: Հենց այս ժամանակահատվածում Կիևը կունենա իրավիճակը փոխելու վերջին հնարավորությունը, կարծում են արևմտյան երկրների ներկայացուցիչները, որոնք կանոնավոր կապ են պահպանում ԱՄՆ-ի հետ Ուկրաինայի հարցով։

«Մենք չենք կարող հավերժ պահպանել օգնության նույն մակարդակը»,-պարբեականին ասել է բարձրաստիճան եվրոպացի պաշտոնյան՝ մատնանշելով, որ այդ մակարդակի աջակցությունը կարող է շարունակվել մեկ կամ երկու տարի, բայց ոչ ավելին: