Ձեր վստահելի աղբյուրը

«Ազգային անվտանգության սպառնալիքները գալիս են Արցախի ու Հայաստանի մասով  գործընթացներից, նաև նարկոտիկների հետ կապված դեպքերն առանձնահատուկ կապ ունեն  ազգային անվտանգության  հետ»,-ԱԱԾ դիմաց «Հայաստանի նարկոմաֆիան» թեմայով հրավիրված ասուլիսում ասաց «Հայաստան» խմբակցության պատգամավոր Անդրանիկ Թևանյանը։

Նա նշեց, որ մի քանի հարցադրումներ կան, որոնք հղում է պատկան մարմիններին, ակնկալում  ստանալ հանրային մեկնաբանություններ։

«Չորս տոննայի չափ կոկաինի շրջանառություն կա Հայաստանում, որն  ավելի քան 1 միլիարդ դոլարի գումար է ենթադրում։ Բնական է, որ Հայաստանի պայմաններում սա չի կարող իշխանությունների հետ  կապ չունենալ։ Ըստ էության, կարելի է ասել՝ Հայաստանի իշխանությունը նարկոմաֆիայի է վերածվել և այդ ամեն ինչի հետ կապված մենք  ողջամիտ կասկածներ ունենք, և ես չեմ կարծում, որ Հայաստանում կա մեկը, ով կարող էր 1 միլիարդ դոլարի շրջանառություն ապահովեր և դա լիներ իշխանություններից դուրս։

Ընդ որում, մենք  չգիտենք՝ սա միակ դեպքն է, թե էլի դեպքեր են եղել։

Այստեղ հարց կարող է առաջանալ՝ որտեղի՞ց Նիկոլ Փաշինյանին և  իր շրջապատին մեկ միլիարդ դոլարից ավելի գումար:

Մենք ողջամիտ կասկած ունենք, որ սա միակ դեպքը չէ և պարզաբանում ենք պահանջում»,-ասաց նա:

Թևանյանը հիշեցրեց քաղաքաշինության կոմիտեի նախկին ղեկավար Վահագն Վերմիշյանի հայտարարությունը. «Այն ժամանակ կասկածներ էր հայտնել,  որ ցեմենտի անվան տակ կոկաին է ներմուծվում, և դրանից հետո նա հայտնվեց անազատության մեջ»։

«Հայտարարում էին, որ կոռուպցիա չկա, ամեն ինչ թափանցիկ է, բայց հիմա փաստորեն մաքսային մարմիններից տեղեկացանք, որ մաքսանենգ ճանապարհով մեկ տոննայի չափ բանանի անվան տակ ներկրվել է թմրանյութ: Սա նշանակում է, որ Նիկոլ Փաշինյանի հայտարարությունը, թե համակարգային կոռուպցիան վերացել է, սուտ է: Գործ ունեն կոնկրետ փաստի հետ, առնվազն 1 միլիարդ դոլարի անհայտ ծագման շրջանառության գումար կա, որը ներմուծվել է նարկոտիկների բիզնեսի մեջ, որն ամենակեղտոտ բիզնեսն է, որն ուղղված է  մեր երկրի դեմ»,- ասաց ընդդիմադիր պատգամավորը։

Նրա խոսքով, սա ուղղված է մեր երիտասարդության դեմ, որին փորձում են շշմեցնել, թմրեցնել:

«Փաստորեն, երիտասարդության դեմ քայլեր արվեցին այն առումով, որ շատերը զոհվեցին պատերազմի ընթացքում, հիմա էլ սպիտակ փոշիով մահ են բերում: Չեմ կարծում, որ սա պատահական է արվում»,- ասաց Թևանյանը։

Նա նշեց նաև, որ կան ողջամիտ կասկածներ, որ այստեղ կա արտաքին ձեռքի ազդեցություն:

«Կարող ենք արդեն կռահել, թե որ երկրներն են շահագրգռված, որ Հայաստան մտնի մոտ 4 տոննա  կոկաին։

Այստեղից էլ բխում են մյուս հարցադրումներ. որտեղի՞ց այն անհայտ ծագման գումարները, որ տնտեսության մեջ կան, հիմնականում շինարարության ոլորտ են մտնում: Իսկ մենք նարկոմաֆիայի պատմությունից գիտենք, որ նրանց գումարները հիմնականում լվացվելու, մաքրվելու համար շրջանառվում է շինարարության մեջ:  Այստեղից էլ պատասխանը, թե ինչու է դոլարն այդքան էժանանում Հայաստանում: Թերևս նարկոտիկների բիզնեսի մեջ դնելու համար  ոմանց էժան դոլար է անհրաժեշտ։

Այստեղ ես նույնպես տեսնում եմ իշխանության ձեռքը»,-ասաց Անդրանիկ Թևանյանը:

Ասուլիսի մասնակից Սթենֆորդի համալսարանի քաղաքագիտության դոտկոր Արթուր Խաչիկյանը հայտնեց, որ իրեն մոտեցավ ԱԱԾ ներկայացուցիչ ու հրավիրել է իրենց ներս՝ քննարկելու հարցը։