Ձեր վստահելի աղբյուրը

«Տիկին Գայանեն մինչ այս պահը սնունդ չի ընդունել, որը գուցե վատթարացնի նրա առողջական վիճակը»,- Ձերբակալվածներին պահելու վայրերի մոտ լրագրողների հետ զրույցում ասաց «Պատիվ ունեմ» խմբակցության ղեկավար Հայկ Մամիջանյանը։

Նա նշեց, որ քիչ առաջ մտել է Ձերբակալվածներին պահելու վայրեր, զրուցել պետի տեղակալի հետ, ով փոխանցել է, որ տիկին Գայանեն հանգստանում է, թույլ է իրեն զգում։ 

Հիշեցնենք, որ 44-օրյա պատերազմում զոհված զինծառայող Ժորա Մարտիրոսյանի մայրը՝ Գայանե Հակոբյանը, ձերբակալվել է նախօրեին Աշոտ Փաշինյանի «առևանգման» գործով։ Նա այժմ գտնվում է Ձերբակալվածներին պահելու վայրերում։ Քիչ առաջ «Հայաստան» խմբակցության պատգամավոր Ագնեսա Խամոյանը հայտարարել էր, որ տիկին Գայանեն հացադուլ է հայտարարել։

«Մենք ապրում ենք, որովհետև Ժորան չկա։ Մենք բոլորս պետք է լինենք զոհվածների հարազատների կողքին։ Այստեղ ցանկացած գործընթաց երկրորդական է, որովհետև եթե հանկարծ հերոսների ծնողները մնան միայնակ, մենք էլ հերոսներ ուղղակի չենք ունենա, էլ ոչ մեկ այն մոտիվացիան չի ունենա դաստիարակել իր  երեխային այնպես, որ ինքը հերոս մեծանա, ամենաթանկը տա հայրենիքին։

Այն չնչին բանը, որ կարող ենք մենք անել համեմատած տղերքի սխրանքի հետ, դա ուղղակի  իրենց ծնողների կողքին լինելն է, որովհետև իրենք դա անել չեն կարող, որովհետև իրենք մեզ են պաշտպանել»,- ասաց Հայկ Մամիջանյանը։