Ձեր վստահելի աղբյուրը

«Ծրագրի մեկնարկից մինչ այս պահը աջակցություն է ստացել 6 409 շահառու, փոխանցված ընդհանուր դրամական միջոցները կազմում են 4 մլրդ 345 մլն դրամ»,-գործադիրի նիստում հայտնեց Աշխատանքի և սոցիալական հարցերի նախարար Նարեկ Մկրտչյանը՝ ներկայացնելով բնակապահովմանն ուղղված կառավարության ծրագրին:

Նա տեղեկացրեց, որ 2021 թվականին ծրագրի  շրջանակներում աջակցություն է ստացել 1949 շահառու, իսկ 2022-ին՝ 3088-ը:

Մկրտչյանը հայտարարեց, որ աջակցություն ստացած շահառուների թվի կտրուկ աճը պայմանավորված է ակտիվ իրազեկման աշխատանքներով, ինչպես նաև պոտենցիալ շահառուների շրջանում մեծ հետաքրքրությամբ և եզրակացրեց, որ ծրագրերն ազդեցություն ունի ընտանիքների վերարտադրողական վարքագծի վրա:

Նախագծով առաջարկվում է  300 մլն դրամով ավելացնել երեխա ունեցող ընտանիքների բնակապահովման պետական աջակցության ծրագրերի 2023 թվականի բյուջեն: 

Նախարարի ներկայացմամբ՝ եթե ընտանիքն ունի երկու անչափահաս երեխա և որոշում է տուն ձեռք բերել կամ կառուցել, աջակցության չափը ձեռք բերվող բնակարանի կանխավճարի 5 %-ի չափով է, առավելագույնը 1 մլն դրամ, որին ավելանում է երրորդ և հաջորդ յուրաքանչյուր երեխայի համար գույքի արժեքի 5 %-ի չափը՝ առավելագույնը կես մլն դրամ:

Երկրորդ բաղադրիչով, ըստ նախարարի, պետությունը տրամադրում է կանխավճարի ապահովագրության ամենամյա վճարը, իսկ երրորդ՝ ամենապահանջված բաղադրիչով. հիպոթեքային արդեն գործող վարկ ունեցող ընտանիքում նոր ծնված երեխայի դեպքում  տրամադրել աջակցություն մայր գումարի մարման համար:

«Աջակցության չափերը հետևյալն են. մինչև կես մլն, եթե ընտանիքում ծնվում է առաջին կամ երկրորդ երեխան, մինչև 2 մլն, եթե ընտանիքում ծնվում է երրորդ և հաջորդ երեխան, մինչև 1.5 մլն, եթե ընտանիքում ծնվել է 1-ին կամ 2-րդ երեխան և շահառուի 25 տարին չի լրացել, մինչև 4 մլն, եթե ընտանիքում ծնվել է 3-րդ և հաջորդ երեխան և շահառուի 30 տարին չի լրացել: «Մենք 4 միլիոնի 60 հաստատված ծրագիր ունենք»,-տեղեկացրեց նախարարը: