Ձեր վստահելի աղբյուրը

«Դժվար կարողանանք համոզել Գայանեին դադարեցնել հացադուլը, քանի որ նա իր խոսքի տեր անձնավորություն է»,- Ձերբակալվածներին պահելու վայրերի մոտ լրագրողների հետ զրույցում ասաց 44-օրյա պատերազմում զոհված  զինծառայող Հակոբ Եղիազարյանի մայրը՝ Գայանե Արզումանյանը։

Նա նշեց, որ միգուցե Գայանեի այս քայլը սթափեցնի ու անաչառ քննություն իրականացնեն, չնայած այդքան էլ հույս ու հավատ չունի։

Հիշեցնենք, որ 44-օրյա պատերազմում զոհված զինծառայող Ժորա Մարտիրոսյանի մայրը՝ Գայանե Հակոբյանը, ձերբակալվել է նախօրեին Աշոտ Փաշինյանի «առևանգման» գործով։ Նա այժմ գտնվում է Ձերբակալվածներին պահելու վայրերում։ Քիչ առաջ «Հայաստան» խմբակցության պատգամավոր Ագնեսա Խամոյանը հայտարարել էր, որ տիկին Գայանեն հացադուլ է հայտարարել։Նա սպասում է Աշոտ Փաշինյանի հետ առերեսման։

Գայանե Արզումանյանը կարծում է, որ Աշոտ Փաշինյանը երես չունի գա, նստի, զոհված զինծառայողի մոր աչքերի մեջ նայի ու իր սուտը կրկնի։

«Քանի որ Փաշինյանի տղան է, չեմ զարմանա, որ, իրոք, ինքը հաղորդում տված լինի։  Նիկոլի տղան էլ իր պես պետք է լինի։ Հնարավոր է ինքն է գրել, հնարավոր է իրեն թելադրել են որ գրի, ամեն ինչ հնարավոր է»,- նշեց զոհված զինծառայողի մայրը։

Նրա խոսքով, Աշոտ Փաշինյանը մեկ քայլ կարող է անել՝ գալ առերեսման ու հրաժարվի իր սուտ ցուցմունքից, դրանով գոնե իր պատիվը մի փոքր բարձրանի կամ պահի։

«Չեմ կարծում, որ մարդ կկարողանա հանգիստ խղճով ապրել, ինչքան էլ վատը լինի՝ իմանալով, որ սուտ ցուցմունք է տվել զոհվածի ծնողի դեմ։ Հույս ունեմ, որ կկարողանա այդքան քաջություն գտնի ու հրաժարվի իր սուտ ցուցմունքներից»,- ասաց Գայանե Արզումանյանը։