Ձեր վստահելի աղբյուրը

Արցախյան երրորդ պատերազմում զոհված Ժորա Մարտիրոսյանի մայրը՝ Գայանե Հակոբյանը  (անձնագրային տվյալներով՝ Ազգուշ Մարտիրոսյան) փաստացի հացադուլի մեջ էր գտնվում երեկ ժամը 15։00-ից։ Այդ ժամից սնունդ չի ընդունել։

«Այսօր արդեն պաշտոնապես  դիմել է հացադուլի վերաբեյալ, նշել է, որ ունի բազմաթիվ հիվանդություններ, և  իր կյանքին վտանգ սպառնալու դեպքում պատասխանտու է  Հայաստանի Հանրապետությունը՝ ի դես իրավասու մարմինների»,- Ձերբակալվածներին պահելու վայրերի մոտ լրագրողների հետ զրույցում ասաց փաստաբան Վահան Հովհաննիսյանը։

Նա նշեց, որ այս պահին ունեն խնդիր. անհապաղության կարգով վիճարկելու են ձեբակալման իրավաչափությունը, քանի որ հացադուլի պայմաններում տիկին Գայանեի  կյանքին վտանգ է  սպառնում։

Փաստաբանը հայտնեց, որ տիկին Գայանեի ձերբակալման որոշման մեջ որպես ձերբակալման նպատակ նշված է՝  փախուստը կանխելը, ինչպես նաև՝ ազատության մեջ գտնվելու դեպքում նա կարող է կրկին առևանգել Աշոտ Փաշինյանին։

«Ոչ միայն իրավաչափ չեն, այլ նաև ծիծաղելի են նշված նպատակները»,- ընդգծեց Վ. Հովհաննիսյանը՝ հավելելով, որ հիմա ձերբակալման իրավաչափությունն անհապաղ կբողոքարկեն դատարանում, հետագա գործողությունների մասին կհայտնեն։

Ինչ վերաբերում է Աշոտ Փաշինյանի հետ առերեսմանը, նա ասաց, որ վերջինս որպես տուժող իրավունք չունի հրաժարվել առերեսումից, խնդիրը ժամն է, թե երբ կիրականացվի։

Հիշեցնենք, որ 44-օրյա պատերազմում զոհված զինծառայող Ժորա Մարտիրոսյանի մայրը՝ Գայանե Հակոբյանը, ձերբակալվել է նախօրեին Աշոտ Փաշինյանի «առևանգման» գործով։ Նա այժմ գտնվում է Ձերբակալվածներին պահելու վայրերում։