Ձեր վստահելի աղբյուրը

«Իշխանությունները նպատային ձևով մեկ օրով ուշացնում են 44-օրյա պատերազմում զոհված զինծառայող Ժորա Մարտիրոսյանի մոր՝ Գայանե Հակոբյանի գործով որոշման հրապարակումը»,- Երևանի ընդհանուր իրավասության դատարանի Շենգավիթ նստավայրի մոտ լրագրողների հետ զրույցում ասաց ԱԺ «Պատիվ ունեմ» խմբակցության քարտուղար Տիգրան Աբրահամյանը։

Հիշեցնենք, որ Երևանի ընդհանուր իրավասության դատարանի Շենգավիթ նստավայրում, դատավոր Ժորա Չիչոյանի նախագահությամբ, ավարտվել է 44-օրյա պատերազմում զոհված զինծառայող Ժորա Մարտիրոսյանի մոր՝ Գայանե Հակոբյանի ձերբակալման իրավաչափության վերաբերյալ  բողոքի, նաև քննչական մարմնի ներկայացրած կալանքի միջնորդության քննությունը։ Որոշումը կհրապարակվի վաղը ժամը 15։00-ին։ Գայանե Հակոբյանը ձերբակալվել է մայիսի 17-ին Աշոտ Փաշինյանի «առևանգման» գործով։

Տ.Աբրահամյանն ընդգծեց, որ պետք է նկատի ունենալ, որ տիկին Գայանեն հացադուլի մեջ է, յուրաքանրյուր ժամ կարող է ազդեցություն ունենալ նրա առողջության վրա։

Ընդդիմադիր պատգամավորի խոսքով, ակնհայտորեն երևում է, որ իշխանությունը  փորձում է տարբեր տեղերում տարբեր դրսևորումներով սրել իրավիճակը, անընդհատ, կարծես թե փորձում է  բախումների, անհանգստությունների տանել։

«Մենք երեք պատերազմների ընթացքում բազմաթիվ զոհեր ենք ունեցել,  ունենք նաև կենդանի հերոսներ, մարդիկ ովքեր այսօր էլ մեզ հետ ապրում են, բայց այս իշխանության համար այդ մարդիկ որևէ արժեք չունեն, իշխանության այսպիսի վերաբերմունքը հենց դրանով է պայմանավորված։

Արժեհամակարգի ոչ միայն փլուզում է, ակնհայտորեն ցույց է տալիս այն բարոյական անկումը, որը կա այս իշխանության մեջ»,- ասաց Աբրահամյանը։