Ձեր վստահելի աղբյուրը

«Մեծ յոթնյակի» երկրների ղեկավարները կոչ են արել Իրանին դադարեցնել աջակցությունը Ռուսաստանին Ուկրաինայի հետ հակամարտությունում: «ՌԻԱ նովոստի»-ն գրում է, որ այդ մասին ասվում է գագաթնաժողովի արդյունքներով տարածված կոմյունիկեում։

Նրանց կարծիքով՝ «Իրանը պետք է դադարեցնի աջակցել» Ռուսաստանի Դաշնությանը Ուկրաինայի հետ կապված իրավիճակում։

«Մասնավորապես, մենք կոչ ենք անում Իրանին դադարեցնել զինված անօդաչու թռչող սարքերի տեղափոխումը...»,-ասված է հայտարարության մեջ։

Արևմտյան երկրները պնդում են, որ Իրանը, իբր, ներկայումս անօդաչու սարքեր է մատակարարում Ռուսաստանին Ուկրաինայում ռազմական գործողությունների համար։ Մոսկվան և Թեհրանը բազմիցս հերքել են նման մեղադրանքները։ Իրանի արտաքին գործերի նախարար Հոսեյն Ամիր Աբդոլլահյանը հայտարարել է, որ Թեհրանը Ռուսաստանի Դաշնությանը մատակարարել է անօդաչու սարքեր, սակայն Ուկրաինայում հատուկ գործողության մեկնարկից մի քանի ամիս առաջ։

«Մեծ յոթնյակի» երկրները լուրջ մտահոգություն են հայտնել Իրանի շարունակական «ապակայունացնող գործողությունների» առնչությամբ, ներառյալ հրթիռների, անօդաչու թռչող սարքերի (ԱԹՍ) և հարակից տեխնոլոգիաների ենթադրյալ փոխանցումը պետական և ոչ պետական դերակատարներին և վստահված խմբերին՝ խախտելով ՄԱԿ ԱԽ-ի բանաձևերը: Ղեկավարները նաև կոչ են արել Իրանին, որն իբր միջամտում է նավագնացության իրավունքների օրինական իրականացմանը, ապահովել առևտրի և ծովային ուղիների անվտանգությունը։