Ձեր վստահելի աղբյուրը

Արցախյան երրորդ պատերազմում զոհված Ազիզ Աղաջանյանը կդառնար 22 տարեկան։

«Ազիզիս ծառայությունը ավարտին էր մոտենում, քույրը ասեց՝ մնաց 9 ամիս, իսկ Ազիզս ասեց՝ չէ, մի հղիություն»,-այսօր զավակների զրույցը հիշել է մայրը՝ Մելանյա Հարոյանը։ 

Մեծահոգի, ընկերասեր, մոր դիպուկ բնորոշմամբ՝ «ջիգյարի կծիկ» էր Ազիզը։

Ամերիկյան համալսարանի ուսանող էր, ծրագրավորող պիտի դառնար…

«Որդուս» ՀԿ-ն ներկայացնում է պատերազմական օրերից մի հուզիչ դրվագ (ընդգրկված է «Կյանքից առավել» գրքի երկրորդ հատորում, որը շուտով լույս կտեսնի).

«Մի օր քայլում էին ականապատ դաշտերով, ցրտին շատ բարակ հագնված, հոգնած, բայց քայլում էին: Մեկ էլ տղաներից մեկի հագին Ազիզը տեսնում է իր մայրիկի գործած սվիտերը։ Մոտենում և ասում է, որ իր մայրիկի գործածն է, խնդրում է տալ իրեն, եթե հագնելու ուրիշ բան ունի։ Տղան տալիս է սվիտերը։ 
Ազիզը զարմացած էր։  Նա ընկերոջն ասում է․ «Պատկերացնու՞մ ես՝ ինչ ճանապարհով ու ինչ ճիշտ պահի մորս  գործած սվիտերը եկավ, հասավ ինձ...»։

Այսպիսի խորհրդանշական դեպքերը վստահություն էին ներշնչում Ազիզին, որ ողջ է մնալու ու կրկին գրկելու է իր սիրելիներին։ Բայց  հոկտեմբերի 18-ին՝ գիշերվա ժամը 1:30, հենց նույն ժամին, երբ լույս աշխարհ էր եկել, նա անմահացավ․․․

Ազիզը ուզում էր որդու անունը Արեգ դնել։ Մի քանի օր առաջ նա եղբայր ունեցավ՝ Արեգ անունով»։

Փոքրիկ Արեգը լույս աշխարհ է եկել զոհված եղբոր ծննդից 4 օր առաջ` փարատելու Ազիզի ընտանիքի վիշտը:

Ինչպես Ազիզի մայրը` Մելանյա Հարոյանն է պատմում` Ազիզը երազում էր որդի ունենալ ու նրան Արեգ անվաներ, ծնողները փորձել են որդու անկատար երազանքն իրենք իրականացնել։

 Արեգը ծնվել է 3,300կգ. և 51սմ. հասակով: Նա իրեն հրաշալի է զգում և արդեն տանն է։