Ձեր վստահելի աղբյուրը

Կառավարության շենքի դիմաց շարունակվում է Արցախյան երրորդ պատերազմում զոհված զինծառայողների ծնողների անժամկետ նստացույցը: Նրանք գիշերն անցկացրել են կառավարության շենքի մոտ:

Նրանք նստացույցը սկսել են մայիսի 20-ից, երբ դատարանի որոշմամբ զոհված զինծառայող Ժորա Մատիրոսյանի մայրը՝ Գայանե Հակոբյանը, Աշոտ Փաշինյանի «առևանգման գործով» մեկ ամսով կալանավորվեց։ Նրանք պահանջում են ազատ արձակել Գ. Հակոբյանին։ 

«Մեր առաջնային խնդիրն է՝ նստացույց անել այնքան ժամանակ, մինչև Գայանեն մեզ հետ լինի։ 2020 թվականի քաոսից հետո ամեն օր ես գնում եմ իմ տղայի տուն՝ «Եռաբլուր», բայց արդեն 4-5 օր է չեմ գնացել, քանի որ  չգիտեմ ինչպես գնամ ու ինչ պատասխան տամ տղաներին։ Ես որ իմ տղայի շիրիմի մոտ եմ կանգնում, տեսնում եմ Ժորա Մատիրոսյանի շիրիմը։ Նա նայում է ուղիղ իմ աչքերի մեջ»,- ասաց 44-օրյա պատերազմում զոհված Մխիթար Գալեյանի հայրը՝ Գարիկ Գալեյանը։