Ձեր վստահելի աղբյուրը

«Մեկ Հայաստան» կուսակցության նախագահ Արթուր Ղազինյանը գրում է.

«Իշխանությունը փոխելը մի խնդիր է, նոր իշխանություն ձևավորել` մեկ այլ խնդիր: Ու իրականում ոչ ոք չի կարող ասել, թե որն է ավելի բարդ խնդիր. եղածը փոխելը, թե՞ նորը ձևավորելը:

Նոր իշխանություն ձևավորելը միայն վարչապետի աթոռին նստելն ու նախարարներ նշանակելև չէ. նոր իշխանություն ձևավորելը դա եղածից 180 աստիճան հակառակ տեսլական ունենալն ու դրա հանրային աջակցություն ապահովելու կարողությունն է: Իսկ դրա հիմքում դրված է մեկ կարևոր գործոն. ԳԱՂԱՓԱՐ:

Կարճ ասած, եթե իշխանությունը խաղաղություն է քարոզում և այդ քարոզի շղարշի տակ պետություն կործանում, ապա դրա այլընտրանքը ՊԱՏԵՐԱԶՄՆ Է, որը միակ միջոցն է պետությունը պահելու և հետագայում այն ուժեղացնելու համար:

Պատերազմը պայքարի միջոց է, հայրենիքն ու տունը թշնամուն հանձնելուց պաշտպանելու ՄԻԱԿ հասանելի ու կիրառական ձևը: Մնացածը «խաղաղության», իսկ իրականում պետության ու պետականության կործանման օրակարգի երանգներ են, որից բովանդակությունը չի փոխվում:

Հ.Գ. Շատ խորքում «արժանապատիվ խաղաղությունը» նոր պատերազմն է, որը կարող է հնարավորություն ընձեռել իրական խաղաղության, նույնն է թե` ուժերի նոր բալանսի ձևավորման համար: Պատերազմն է մոբիլիզացնելու աշխարհահայության ներուժն ու ռեսուրսները, կազմակերպելու և ինստիտուցիոնալիզացնելու է հայկական պետականությունն ու այն ամրացնող ու պահպանող օժանդակ ռեսուրսները:

Մի վախեցեք ու մի փախեք պատերազմից, ինչքան փախաք, այնքան պատերազմը գալու է ձեր հետևից` նոր զոհերով ու տարածքային կորուստներով»։