Ձեր վստահելի աղբյուրը

«Երեկ՝ հերթական անգամ, ադրբեջանական թեզերը 100 տոկոս կրկնելով՝ դավաճանական հայտարարություններ էին  հնչում, հայրենիքի հատվածները թշնամուն հոժարակամ  հանձնելու մասին հայտարարություններ էին հնչում»,- Ազգային ժողովի նիստի ընթացքում հայտարարեց «Հայաստան» խմբակցության պատգամավոր Գեղամ Մանուկյանը։

Այնուհետև նա առանձնացրեց ԱԺ օրակարգում ընդգրկված մի հարց՝ «Պետական պաշտոններ ու պետական ծառայության պաշտոններ զբաղեցնող անձանց վարձատրության մասին» նախագիծը։

«Պարզ ասած՝ դա քննիչների աշխատավարձը բարձրացնելու մասին է։ Երբ հայրենիքի սահմանները պաշտպանող զինվորականների աշխատավարձը բարձրացնելն  ատեստացիայով է, շուրջ 3000 հարց պետք է անգիր անի զինվորականը, որ  աշխատավարձը բարձրացվի, այսպես քննիչների աշխատավարձն ուզում են բարձրացնել»,- ասաց ընդդիմադիր պատգամավորը։

Նա նշեց, որ չի ուզում վիրավորել ազնիվ քննիչներին,  որոնք ճկռում են քրեական գործերի տակ։

«Բայց անցնող տարիներին  շատ հաճախ քննիչների հետ առերեսվելուց ասում ենք՝ արա, էս ինչ եք անում, հերիք է Նիկոլի հանձնարարականներով կեղծ  քրեական գործեր հարուցեք, ասում են՝ դե տուն ենք պահում։ Հիմա տուն պահելու համար  աշխատավարձը մի քիչ էլ են ավելի բարձրացնում։

Այդ տուն  պահող քննիչները Արցախյան առաջին պատերազմի, Քառօրյայի մասնակից Գեորգի  Արիստակեսյանի դեմ քրեական գործ հարուցեցին, վերջերս արդարացվեց։ Այդ տուն պահող քննիչները Փաշինյանի հանձնարարականով Իգոր Խաչատուրովի դեմ քրեական գործ հարուցեցին, արդարացվեց դատարանով։ Այդ տուն պահողները մի քանի օր առաջ  44-օրյա պատերազմում զոհված Ժորա Մարտիրոսյնաի մորը՝ Գայանե Հակոբյանին, սրիկայաբար մեղադրանք առաջադրելով կալանքի տակ պահեցին։

Տուն պահողները, քաղաքական պատվեր կատարողներն, որ այսօր աշխատավարձ բարձրացնելու ակնկալիք ունեն. թող իմանան, որ այս իշխանության քայլերի արդյունքում վաղը, մի օր թուրքի տուն են պահելու, բայց հավաքարարի տեսքով», - ասաց Գեղամ Մանուկյանը։