Ձեր վստահելի աղբյուրը

«Երբ նորակառույց բազմաբնակարան շենքերում հաճախորդ են դառնում, բավականին մեծ գումարներ են վճարում, որոնք եկամուտներ են ապահովում, դուք հիմա այդ գումարի 75 %-ը սառեցնում եք և կառուցապատողին ասում եք՝ գնացեք բանկից գումար վերցրեք»,-հարակից ելույթով հանդես եկող էկոնոմիկայի նախարար Վահան Քերոբյանին հարցրեց ՔՊ-ական պատգամավոր Խաչատուր Սոքիասյանը՝ Գևորդ Պապոյանի նախաձեռնած օրենքի նախագիծը քննարկելիս:

Վերջինս առաջարկում է  բազմաբնակարան շենքի գնորդների վճարած նախնական գումարների 75%-ը սառեցնել հատուկ բանկային հաշիվների վրա, որպեսզի, եթե ինչ-ինչ պատճառներով շենքի կառուցումը չավարտվի, գնորդների գումարները չկորեն, կամ այդ սառեցված գումարներով կիսատ մնացած շենքն ավարտին հասցվի:

Ըստ Պապոյանի՝  կառուցապատողը քաղաքացիների տված ամբողջական գումարին հասանելիություն կունենա, երբ բնակարանները հանձնի քաղաքացիներին:

Քերոբյանն էլ հավելեց, որ բազմաբնակարանների տները ՀԷՑ-ին միացնելու ծախսերի մի մասը փոխհատուցելու է կառուցապատողը:

Խաչատուր Սուքիասյանը պնդեց, որ եթե շենքը կառուցելիս կառուցապատողի եկամուտները պակասի՝ նա սկսելու է բնակարանների գինը բարձրացնել:

Սուքիասյանը անընդունելի համարեց, որ նախագծով սառեցնում են քաղաքացիների վճարած գումարները, կառուցապատողին ստիպում են վարկ վերցնել, զուգահեռ էլ կոմպեսացնել նույն բազմաբնակարանի համար գազի կամ այլ ենթակառուցվածքների կառուցումը:

«Դուք մտքեր ասացիք, բայց ոչ մի հիմնավորում չկար, քանի տոկոս է կորուստը, կառուցապատողն ինչքան գումար է վճարելու, ՀԷՑ-ը ինչքան է ներդրում անելու, ինչքան է ներդրումը բնակարանի 1 ք/մ-ի վրա, որպեսզի կառուցապատողը հասկանա, թե 10 տարվա ընթացքում այդ գումարը հետ է գալու, թե ոչ: Սա շատ անընդունելի զրույց է մեզ համար՝ ԱԺ ամբիոնում էս կարգի քննարկումը»,-կառավարության կողմից հարակից ելույթով հանդես եկող Վահան Քերոբյանին դիմեց Խաչատուր Սուքիասյանը:

Պատգամավորը կարծիք հայտնեց, որ տան վաճառքով զբաղվո գործակալությունները պետք է աշխատեն նաև դրսից  գնորդներ բերեն, ոչ միայն ներքին շուկայի վրա աշխատեն:

«Երկրորդ հարցը  չհասկացա բայց»,-արձագանքեց էկոնոմիկայի նախարարը:

Սուքիասյանը պարզաբանեց. «Դուք պետք է աշխատեք գործակալություններին սովորացնեք, որ ոչ միայն ՀՀ քաղաքացիների վրա բնակարան վաճառեն, այլ մեր սփյուռքի 7 մլն-ի վրա, որովհետև շինարարությունը խթանում է ՀՆԱ-ն»:

Քերոբյանը ընդունեց որ շինարարությունը տնտեսության աճող ճյուղերից է  նախորդ տարի 12.3 % է եղել աճը, այս տարվա առաջին եռամսյակում 15.6 %, բայց հարցը պետք է քննարկվի գործակալությունների հետ: