Ձեր վստահելի աղբյուրը

Մայիսի 24-ին ՀՀ ԳԱԱ նախագահությունը Հայաստանի կենսաբանական հանդեսի գլխավոր խմբագրի պաշտոնում ընտրել է կենսաբանական գիտությունների դոկտոր Արսեն Առաքելյանին։

ԳԱԱ գիտության հանրայնացման և հասարակայնության հետ կապերի բաժնի փոխանցմամբ, Արսեն Առաքեյանը ներկայացրել է  Հայաստանի կենսաբանական հանդեսի հետագա զարգացման պլանը։ Նա նշել է, որ հանդեսը լույս է տեսնելու բացառապես անգլերեն լեզվով և էլեկտրոնային տարբերակով: Ամսագրի  խմբագրական կազմում ներգրավվելու են նաև արտասահմանյան գիտնականներ:

Արսեն Առաքելյանը ծնվել է 1979թ․ Երևանում: Ավարտել է ԵՊՀ Կենսաբանության ֆակուլտետը: 2004թ-ին պաշտպանել է թեկնածուական ատենախոսություն: 2020թ-ից կենսաբանական գիտությունների դոկտոր է:

Արսեն Առաքելյանի գիտական գործունեության ուղղություններն են` մոլեկուլային և բջջային կենսաբանություն, մոլեկուլային իմունաբանություն, կենսաբժշկություն, կենսաքիմիա, կենսաինֆորմատիկա, գենոմիկա, տրանսկրիպտոմիկա:

Արսեն Առաքելյանը 257 գիտական աշխատության հեղինակ է, այդ թվում գրքերում՝ 7, գիտական ամսագրերում՝ 150, գիտաժողովների հավաքածուներում՝ 100 աշխատության:

2015թ-ից Արսեն Առաքելյանը Մոլեկուլային կենսաբանության ինստիտուտի տնօրենն է: Միաժամանակ նա ղեկավարում է Հայ-Ռուսական համալսարանի կենսաբժշկության և ֆարմացիայի ինստիտուտը, Մոլեկուլային կենսաբանության ինստիտուտի և Ինֆորմատիկայի և ավտոմատացման պրոբլեմների ինստիտուտի համատեղ «Տեղեկատվական կենսաբանության լաբորատորիա» ծրագրի համաղեկավարն է:

2012, 2014, 2018, 2021 թվականներին արժանացել է ՀՀ ԿԳՄՍՆ Գիտության կոմիտեի «Արդյունավետ գիտաշխատող» պարգևին, 2012թ-ին ճանաչվել է միջազգային գիտական հանդեսներում առավելագույն հղում ունեցող հոդվածների մրցույթի հաղթող: 2010 թ-ին ՌԴ «Կրթության, գիտության և առողջապահութլան զարգացում» ԲՀ-ի կողմից արժանացել է III կարգի դիպլոմի լավագույն գիտական մշակման համար: