Ձեր վստահելի աղբյուրը

«Դատախազությունն այս պահին մեկնաբանություն չունի»,-Panorama.am-ի այն հարցին՝ հնարավո՞ր է, որ գլխավոր դատախազութունն օգտվի զոհվածի մոր կալանավորումը վերացնելու լիազորությունից, արձագանքեցին դատախազությունից։

Հիշեցնենք, որ արցախյան երրորդ պատերազմում զոհված Ժորա Մարտիրոսյանի մայրը՝ Գայանե Հակոբյանը մայիսի 20-ից կալանավորված է, մինչ այդ երկու օր գտնվում էր Ձերբակալվածների պահման վայրում։ Նրան մեղադրում են Նիկոլ Փաշինյանի որդուն՝ Աշոտ Փաշինյանին առևանգելու համար։

Երեկ այս գործի շուրջ մի քանի ուշագրավ զարգացումներ եղան. նրա փաստաբաններ Վահան Հովհաննիսյանը, Ռուբեն Մելիքյանը, Վահան Գևորգյանը տարածեցին համատեղ հայտարարություն, որտեղ մասնավորապես ասված է. «Վերջին օրերի իրադարձություններն ամբողջությամբ ձեր աչքի առջև էին, ուստի անսպասելի չի լինի մեր այն համոզմունքը, որ տիկին Գայանեի արդյունավետ պաշտպանության իրավական գործիքակազմն այլևս սպառված է։ Նշվածի հիման վրա՝ հայտնում ենք, որ խորհրդակցելով թե՛ մեր վստահորդի և թե՛ նրա ընտանիքի հետ, որոշում ենք կայացրել դադարեցնելու մեր մասնակցությունը քրեական վարույթի հետագա ընթացքին»։

Ավելի ուշ զոհված զինծառայողների ծնողները հայտարարեցին կառավարության դիմաց նստացույցը դադարեցնելու մասին։