Ձեր վստահելի աղբյուրը

Ազգային ժողովում կառավարության հետ հարցուպատասխանի ժամանակ «Քաղաքացիական պայմանագիր» խմբակցության անդամ Գուրգեն Արսենյանը հայտարարեց, որ Հայաստանում արտադրվող կաթնամթերքի մեջ կան հավելումներ, որոնք չպետք է լինեն։

«Պետք է որոշակի ժամանակ տանք ու ասենք՝ այս օրվանից Հայաստանում արգելվում է  այդ հավելումների օգտագործումը, քանի որ դա կանցերոգեն է, դրա հետևանքները պետության ու հասարակության վրա հետո շատ թանկ է  նստում։  Երեխաներն են հիմնականում ուտում կաթնամթերք։ Դա հասարակության  անվտանգության կարևորագույն գործոն է»,- ասաց նա։

ՔՊ-ական պատգամավորի հացին պատասխանեց Նիկոլ Փաշինյանը։ Նա նշեց, որ 2018 թվականին հանձնարարել էր ստուգել, թե ինչ կա թթվասերի մեջ և իրեն զեկուցել են, որ  թթվասերի մեջ կաթ չկա։

«Բա ի՞նչ կա։ Սոյայի յուղ և այլն։ Բայց այնպես չէ, որ դա առողջության համար  վտանգավոր է։ Այլ բան, որ դա թթվասեր չէ։ Դրանք տարբեր բաներ են։ Մարդկանց մեջ սխալ տպավորություն  չստեղծվի, հակառակ դեպքում  կստացվի, որ մենք գիտենք՝ մարդկանց համար վտանգավոր բան ենք վաճառում և թույլ ենք տալիս։ Չկա նման բան։

Կան հավելումներ, որոնք մարդու առողջության համար վտանգավոր չեն։ Ասել եմ՝  չպետք է թողնենք վրան գրեն թթվասեր։  Ընթացքում  արտադրողներն ավելացրել են թթվասերի բաղադրությունը, որպեսզի  թթվասեր համարվելու հնարավորություն ունենա։ Այնպես չէ, որ թթվասերի մեջ 100 տոկոս  մենակ կաթ պետք է լինի։ Օրինակ, սոյան վտանգավոր չէ, ընդհակառակը շատ օգտակար սննդամթերք է։

Ուզում եմ տարբերակենք՝ սննդի  ստանդարտը սննդի անվտանգությունից։ Այսինքն  ձեր ասածը մարդու առողջության համար վտանգավոր չէ, այլ բան, որ պետությունն ասում է՝ մենք պետք է ունենանք թթվասերի ստանդարտ բաղադրատոմս, որ թթվասեր կոչվի»։

Նշենք, որ Գուրգեն Արսենյանի հարցն ուղղված էր էկոնոմիկայի նախարար Վահան Քերոբյանին, սակայն ամբիոնին Փաշինյանը մոտեցավ՝ ասելով. «Ես մոտեցա ամբիոնին, որովհետև հասկացա, որ կովերի ցրտադիմացկունության մասին թեման դառնալու է սոցիալական ցանցերի թիվ մեկ քննարկման թեման։ 2018թ-ին, երբ ես արդեն վարչապետ էի, այդ թեմայով մի քննարկում ունեցա ՀՀ-ում գործունեություն ծավալող  գյուղատնտեսական ոլորտի ամենահեղինակավոր կազմակերպության հետ և քննարկում էինք խելացի անասնագոմերի ծրագիրը։

Որպես գյուղում երկար տարիներ ապրած մարդ, երբ հարցրի, թե անասնագոմերի տաքացման հարցը ոնց է լուծվելու, փորձագետներն ասացին՝ ինչ գոմերի տաքացման թեմա։ 21-րդ դարում աշխարհում չկա որևէ անասնագում, որը տաքացվում է՝ հղում անելով մասնագետներին։

Եթե կովը ցրտադիմացկուն չէ, ուրեմն կով չէ ու այն կովը, որը օրը 10 լիտր կաթ է տալիս, ժամանակակից իմաստով  ինքը կով չէ։ Օրը 10 լիտր կաթ տվող կովը տնտեսապես վնասաբեր է։ Խոշոր եղջերավոր անասունների ջերմությունը բավարար է, որ իրենք իրենց տաքացնեն»։