Ձեր վստահելի աղբյուրը

«Մենք ակնկալում ենք, որ ադրբեջանական երկաթուղիները բաց կլինեն Հայաստանի բեռների համար»,-այս մասին հայտարարել է Հայաստանի վարչապետի պաշտոնը զբաղեցնող Նիկոլ Փաշինյանը ՌԴ նախագահ Վ. Պուտինի հետ հանդիպմանը։

Նա նշել է, որ ակնկալում է՝ Հայաստանի գնացքները Նախիջևանի տարածքով կհասնեն օրինակ Ռուսաստանի Դաշնություն կամ էլ Իրանի Իսլամական Հանրապետություն։

«Մենք ակնկալում ենք այս հարցերի պարիտետային լուծում՝ հիմնված, ինչպես ես արդեն ասեցի, հիմնված երկրների ինքնիշխանության և իրավազորության վրա»,-ասել է նա։
Ի պատասախան Վ. Պուտինը հայտարարել է, որ տրանսպորտային երթուղիների, կոմունիկացիաների՝ և՛ երկաթուղիների, և՛ հնարավոր ճանապարհների ապաշրջափակման վերաբերյալ ռուսական կողմի դիրքորոշումն  անփոփոխ է։

«Ադրբեջանական պատվիրակության հետ երկկողմ շփման ընթացքում, մենք խոսել ենք այդ մասին։ Պետք է ասել, որ ադրբեջանական կողմը նույնպես հաստատում է, որ Ադրբեջանն այս հարցում որևէ փոփոխություն չունի, նրանք ճանաչում են Հայաստանի ամբողջական ինքնիշխանությունն այս տարածքի նկատմամբ և հնարավոր ապաշրջափակման վերաբերյալ կրկնակի, եռակի մեկնաբանությունները որևէ հիմք չունեն։  Այդուհանդերձ, հարցեր կան, հենց նոր նշեցիք, կարծում եմ, կապված են տերմինաբանության հետ։ Կարծում եմ, որ մենք կարող ենք ավելի մանրամասն խոսել այս մասին»,-ասել է Վ. Պուտինը։