Ձեր վստահելի աղբյուրը

«Այո, Ադրբեջանի նախագահի կողմից նման հայտարարություն հնչեց, բայց Հայաստանի վարչապետի կողմից էլ հնչեց այդ հայտարարության պատասխանը, ըստ որի՝ առհասարակ մենք առաջին անգամ ենք լսում, որ Ռուսաստանն աջակցում է Ալիևի կողմից հնչեցրող նարատիվին, խոսքը միջանցքային տրամաբաննության խոսքի մասին է»,-ԱԺ ճեպազրույցների ժամին հայտարարեց ՔՊ խմբակցության քարտուղար Արթուր Հովհաննիսյանը՝  պատասխանելով նախորդ օրը Մոսկվայում ԵԱՏՄ -ի շրջանակներում կայացած հանդիպման ժամանակ միջանցքի վերաբերյալ Ալիևի արած հայտարարության մասին հարցին:

ՔՊ-ական պատգամավորը հավելեց, որ նույն Ալիևը հայտարարել է, որ միջանցքի ներքո նկատի չունի իր երկրի սահմաններից դուրս տարածքները:

Հովհաննիսյանը տեղին չհամարեց լրագրողի  հարցը, թե արդյո՞ք հայկական կողմը միջանցքի հարցում կգնա զիջումների:

ՔՊ-ական մյուս պատգամավորը՝ Վլադիմիր Վարդանյանն էլ, պատասխանելով լրագրողների հարցերին, ասաց որ համադրելի չեն Լաչինի միջանցքը և տարածաշրջանի կոմունիկացիաների բացման հարցը, քանի որ  այն առանձին կետով ամրագրված է 2020 թվականի նոյեմբերի 9-ի  եռակողմ հայտարարության մեջ:

Հարցին, թե ինչու Մոսկվայում Փաշինյանի, Պուտինի և Ալիևի եռակողմ հանդիպումից հետո առաջին անգամ արդյունքների մասին հայտարարություն չեղավ, արդյո՞ք այն հանդիպման տապալման մասին է խոսում՝ Վլադիմիր Վարդանյանը պատասխանեց.«Դիվանագիտությունը շատ ավելի ճկուն է և չունի որոշակի տրամաբանական հստակ օրինաչափություններ, որ որևէ հանդիպման արդյունքով պետք է անպայման հայտարարություն լինի»: