Ձեր վստահելի աղբյուրը

«Թմրամիջոցների հետ կապված իրավիճակն իրոք մտահոգիչ է, ունենք հայտնաբերման ցուցանիշներ որոնք և գոհացնող են և մտահոգիչ»,-ԱԺ մշտական հանձնաժողովների համատեղ նիստում  «ՀՀ 2022 թ. պետական բյուջեի կատարման մասին» տարեկան հաշվետվության նախնական քննարկումների ժամանակ հայտարարեց ՆԳ նախաար Վահե Ղազարյանը:

Նախարարը հայտնեց, որ Հայաստանում շատ կա թմրամիջոցներ, դրա համար էլ այսօր շատ են բացահայտումները:

Պաշտպանության և անվտանգության հարցերով մշտական հանձնաժողովի նախագահ ՔՊ-ական Անդրանիկ Քոչարյանը  հետաքրքրվեց, թե ինչ է արվում որպեսզի կոկայինի բացահայտումների համատեքստում կասկածվող բանան ներմուծող ընկերության սեփականատիրոջը Ռուսաստանից Հայաստան բերեն:

Վահե Ղազարյանը հայտարարեց, որ նախաքննությունից ելնելով, ցանկանում է շատ բան չհայտարարել, բայց հավաստիացրեց, որ այդ ուղղությամբ բավականին մեծ աշխատանքներ են տարվում:

Նախարարը տեղեկացրեց, որ վերջերս Հայաստան ժամանած ՌԴ ՆԳ նախարարի առաջին տեղակալ Խրապովի հետ քննարկել են այդ հարցը:

«Քննարկումների դրական արդյունքների մասին մոտ ժամանակներս կիրազեկենք հասարակությանը»,-հավաստիացրեց Վահե Ղազարյանը:

Անդրանիկ Քոչարյանը հույս հայտնեց, որ տարբեր ժամանակներում տարբեր ձևերով Հայաստանը լքած «ՀՀ քաղաքացիները» կվերադառնան Հայաստան և կհամագործակցեն նախաքննական մարմինների հետ:

Վահե Ղազարյանն էլ լրացուցիչ տեղեկացրեց, որ համացանցով թմրանյութերի վաճառքի դեմ ոստիկանությունում ստորաբաժանում է ձևավորվել և արդեն կան բացահայտումներ, որում ընդգրկված է 250 մարդ: