Ձեր վստահելի աղբյուրը

«Նախատեսում է Հայաստանում ներդնել իգական սեռի քաղաքացիների կամավոր հիմունքներով պարտադիր զինվորական ծառայության համակարգ»,- ԱԺ Պաշտպանության և անվտանգության հարցերի մշտական հանձնաժողովի նիստում հայտարարեց պաշտպանության նախարար Սուրեն Պապիկյանը՝ ներկայացնելով «Զինվորական ծառայության և զինծառայողի կարգավիճակի մասին» ՀՀ օրենքում լրացումներ և փոփոխություն կատարելու մասին, «Պաշտպանության մասին»  ՀՀ օրենքում լրացումներ կատարելու մասին օրինագծերը։

«Հայաստանի քաղաքացի իգական սեռի այն ներկայացուցիչները, որոնց  տարիքային շեմը 18-27 է, իրենց ցանկությամբ, կամավոր եթե ուզում են վեցամյսա զինծառայության անցել Հայաստանի Զինված ուժերում, դիմում են ներկայացնում  մոտակա զինվորական կոմիսարիատ, սկսվում է  նրանց հաշվառման պրոցեսը, առողջության ստուգումը, այսինքն անցնում են  այն ստանդարտ պրոցեդուրաներով, որով անցնում է  զորակոչիկը։ Այն օրը, երբ մեկնարկում է զորակոչը, մինչ այդ օրը բոլոր պրոցեդուրաներն անցնելուց, հաստատվելուց հետո  կարող է միտքը փոխել, բայց այն օրվանից, երբ համարվում է զինծառայող, այդ օրվանից ծառայությունն այլևս դառնում է պարտադիր»,- մանրամասնեց Պապիկյանը։

Նա ասաց, որ վեցամսյա ծառայությունը հիմք է հանդիսանում, որ հաշվառումից հետո նրանք հանդիսանան լիիրավ և հավասարազոր պահեստազոր։

Հարցին՝  վեց ամիս հետո կստանան 1 միլիոն պատվովճար, իսկ վեց ամսվա ընթացքում ամեն ամիս ինչ-որ գումար ստանալո՞ւ են կին զինծառայողները, Պապիկյանը նշեց, որ այս պահին նախատեսված է զինծառայողին հասանելիք վճարը, բայց քննարկում են նաև այդ վճարի չափը որոշակի փոփոխության ենթարկել։

Հարցին՝ ինչո՞ւ են անում նման փոփոխություն, Սուրեն Պապիկյանն ասաց. «Շատ կարևոր է, որ Հայաստանի իգական սեռի քաղաքացիներն իրենց զգան լիիրավ և հավասար տղամարդկանց,  այդ թվում նաև հայրենիքը  պաշտպանելիս։ Մենք անընդհատ խոսում եք կանանց իրավունքների մասին, որն ավելի շատ թույլի պաշտպանելու մասին է, կարծում եմ՝ կանայք  շատ ավելի ուժեղ են, քան ձևավորված է կարծիք։ Ունենք իգական սեռի հայրենասեր քաղաքացիներ, ովքեր ուզում են ծառայել իրենց հայրենիքին»։

«Մենք հարթակը ստեղծում ենք, որի հիմքում  դրված է կամավորությունը, բայց միաժամանակ հավասար հնարավորություն ստեղծելով տղամարդկանց հետ»,- ասաց Պապիկյանը։

«Հայաստան»  խմբակցության պատգամավոր Գեղամ Մանուկյանն ասաց. «Այսօր հարց հնչեց ուղղված Սուրեն Պապիկյանին՝ ինչի՞ համար է  այս նախագիծը՝  համալրմա՞ն, մարդուժի՞... Բայց համապարփակ պատասխան այդպես էլ չհնչեց։ Երկրի անվտանգության, Զինված  ուժերի բարեփոխումների մակարդակի բարձրացման հարցը գենդերային հավասարության հետ որևէ աղերս չունի։

Զինված ուժերի բարեփոխումների հայեցակարգի մեջ գլխավոր հարցերից մեկը դարձնել  գենդերային հավասարությունը...

Համարել, որ այս քայլերով Զինված ուժերի պրոֆեսիանալ բանակ  դարձնելու գործընթացում հեղափոխական քայլ ենք անում,  չեմ կիսում այդ տեսակետը։ Ինչ վերաբերում է  բանակի հեղինակությանը, այս տարիներին կարելի էր շատ բան չանել ու բանակի հեղինակությունը շատ ավելի բարձրացնել, կարելի էր  շատ զինվորականների վրա ցեխ շպրտել,  բանակի հեղինակությունը բարձրացնել, ...»։