«Փաստ». ՔՊ-ն այս տարիների ընթացքում ցանկացած միջոցի դիմել է բոլոր ոլորտները քպացնելու համար

09:23 30/05/2023

«Փաստ» թերթը գրում է.

«Գաղտնիք չէ, որ Նիկոլ Փաշինյանի ՔՊ-ն այս տարիների ընթացքում ցանկացած միջոցի դիմել է բոլոր ոլորտները քպացնելու համար: Բացառություն չեն նաև ՏԻՄ-երը: Բացի ընտրական գործընթացներում Հայաստանի երեսնամյա պատմության համար աննախադեպ վարչական ռեսուրս կիրառելուց, այդ թվում՝ իրավապահների կողմից մրցակիցների վրա տոտալ ճնշումները, այն համայնքներում, որտեղ, այդուամենայնիվ, պարտվել են, քպականներն ամեն ինչ անում են նոր ընտրությունների հասնելու համար՝ ի մասնավորի ավագանու աշխատանքները ձախողելու փորձերով և նիստերին չմասնակցելով: Մեր տեղեկություններով, վերջին «գործելաոճը» նրանք կիրառում են նաև այն համայնքներում, որտեղ իրենց մասնակցել-չմասնակցելը ոչինչ չի որոշում:

Դրանցից մեկը Տաթև խոշորացված համայնքն է, որտեղ պարտված ՔՊ-ի ներկայացուցիչները չեն մասնակցում ավագանու նիստերին: Եվ ահա, օրերս կայացած ավագանու նիստի ընթացքում «Ապրելու երկիր» և «Շանթ դաշինք ազգայնական» խմբակցության անդամների քվեարկության արդյունքում ընդդիմադիր «Քաղաքացիական պայմանագիր» խմբակցության 6 անդամ զրկվել է մանդատից՝ ավագանու նիստերից անհարգելի բացակայելու համար։

Հիշեցնենք, որ 2021 թ. նոյեմբերին կայացած ընտրություններից հետո Տաթև համայնքում «Ապրելու երկիր» խմբակցության և «Շանթ դաշինք» խմբակցության միջև ստորագրվել էր համագործակցության հուշագիր, որի համաձայն, համայնքի ղեկավար էր ընտրվել «Շանթ դաշինք» կուսակցության համամասնական ցուցակի առաջին համար Սամվել Լալայանը, համայնքի ղեկավարի առաջին տեղակալ՝ «Ապրելու երկիր» կուսակցության համամասնական ցուցակի առաջին համար Մարատ Գերասիմյանը»։

Մանրամասները թերթի այսօրվա համարում

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: