Եկվորները փորձում են յուրացնել բնիկների ոչ միայն մշակույթը, այլև տարածքներն ու տեղանունները. Ռուբեն Մելքոնյան
Երևանում՝ ԵՊՀ իրանագիտության ամբիոնն ու Թեհրանի համալսարանի «Կովկասյան հետազոտությունների կենտրոնը» համատեղ կազմակերպել են «Հայաստան-Իրան հազարամյակների բարեկամությունը և տարածաշրջանային զարգացումները» խորագրով կլոր-սեղան քննարկում:
«Մեր առաքելությունն ենք համարում նաև Հայաստան-Իրան հարաբերությունների համար գիտամշակութային մթնոլորտի ստեղծմանը նպաստ բերելը, քանի որ հենց նման մթնոլորտում է շատ հաճախ ձևավորվում քաղաքական, դիվանագիտական, նաև տնտեսական հարաբերություններ»,- քննարկման մեկնարկին ասաց ԵՊՀ Իրանագիտության ամբիոնի վարիչ Վարդան Ոսկանյանը։
Նրա խոսքով, այս ամենը հաշվի առնելով, ակադեմիական համագործակցության շրջանակներում որոշում կայացրեցին խորացնել Թեհրանի համալսարանի, մասնավորապես Թեհրանի համալսարանի «Կովկասյան հետազոտությունների կենտրոնի» հետ համագործակցությունը։ Վ.Ոսկանյանը հայտնեց, որ այստեղ ունենալու են նաև կենտրոնի ոչ պաշտոնական մշտական ներկայացուցչություն, հետևաբար այս իմաստով համագործակցությունը երկարաժամկետ է։
ԵՊՀ Արևելագիտության ֆակուլտետի դեկան Ռուբեն Մելքոնյանն ասաց, որ մեծ պատիվ և ուրախություն է ողջունել նման գիտական, կարելի է ասել քաղաքակրթական միջոցառումը, որի արմատները գնում են հազարավոր տարիներ առաջ, և իրենք էլ իրենց պարտքը գիտակցելով՝ շարունակում են հազարամյակների այդ տրադիցիան, որը կապում է այս տարածաշրջանի բնիկ ու հինավուրց ժողովուրդներին։
«Մեր երկու ժողովուրդների մշակույթում, ավանդույթներում գիտությունը, գիտելիքի հանդեպ հարգանքն ունի բարձրագույն աստիճան։ Եվ մշակույթն ընկալելու համապատկերում նաև հարգանքն է փոխադարձ պատմությունների, մշակույթների, քաղաքակրթությունների հանդեպ, որի վրա էլ խարսխված է բարեկամությունն ու խաղաղությունը»,- նշեց նա։
Նրա կարծիքով, հատկապես այս փոթորկուն ժամանակաշրջանում հայերն ու իրացիները լավագույն օրինակը կարող են ծառայել իրար կողք ապելու, իրար հարգելու և խաղաղությունը ոչ թե բառերով, այլ իրականում փայփայելու ու շարունակելու հարցում։
«Տարածաշրջան ներմուծված տարբեր ժողովուրդներ ոչ միայն չեն յուրացրել այս տարածաշրջանի բարեկամության ու խաղաղության խաղի կանոնները, այևս փորձում են այս հաստատված իրողությունները փոխել, այլափոխել, այլասերել՝ առաջ բերելով թշնամանք, պատերազմներ, վանդալիզմ և այլն։
Եկվոր ու ներմուծված այդ ժողովուրդները յուրացնում են կամ փորձում են յուրացնել բնիկների ոչ միայն մշակույթը, գրականությունը, մեծանուն գրողներին, այլև տարածքներն ու անգամ տեղանունները։
Եվ այդ համապատկերում հայերն ու իրանցիները եկվորների թիրախն են։ Հետևաբար, մենք ավելի քան պարտավորված ենք դարավոր, մեր լավագույն տրադիցիաները նաև գիտական հարթակներում շարունակել պրոպագանդել»,- ասաց Ռ.Մելքոնյանը։
Նա ընդգծեց, որ այս քննարկումը կլինի ևս մեկ քայլ ընդդեմ տգիտության, թշնամանքի և ընդդեմ խաղաղության այլասերման. «Գիտելիքն ու իմացությանը կհաղթի տգիտությանը և դրանից սնվող թշնամանքին։ Մենք հավատում ենք դրան»։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
