Ձեր վստահելի աղբյուրը

«Օկուպացիոն ռեժիմի ներկայացուցիչները հստակ որդեգրել են մի ճանապարհ՝ հայկական պետականության ջախջախում, վերացում»,- «Հայրենիք, թե՞ «կադաստրի թղթով» ցեղասպանություն» թեմայով քննարկմանն ասաց ԱԺ «Հայաստան» խմբակցության պատգամավոր Ասպրամ Կրպեյանը։

Նա նշեց, որ վտանգների մասին տևական ժամանակ խոսել են ու ժամանակը ցույց տվեց, որ իրենց մատնանշած վտանգները, ռիսկերը իրականություն են դարձել։

«Այս հանցախմբի ներկայացուցիչներն իրենց պարագլխի գլխավորությամբ ապրիկար չեն, անկարող չեն, անփորձ չեն, որ դրա հետևանքով մենք ունենք այս իրականությունը, այլ 2018 թվականից հենց  դավադիր քաղաքականությամբ են եկել իշխանության և հենց այդ դավադիր քաղաքականությունն է, որ ամեն քայլափոխի, ամեն վայրկյան  իրագործում են։ Դա մենք տեսնում ենք, ապրում ենք, տեսնում են գրեթե կես տարի շրջափակման մեջ գտնվող մեր սիրելի հայրենակիցները Արցախում, դա տեսնում են սահմանամերձ բնակավայրի բնակիչները, ովքեր անպաշտպան են մնացել թշնամական ուժերի դիմաց, Տեղ համայքնում, Սոթքում, որտեղ մարդիկ պարզապես ապավինում են իրենց անձնական ուժերին, նախաձեռնությանը, տարբեր անհատներից կազմված խմբերի նախաձեռնողականությանը, որ կարողանան իրենց կենսական, տարրական իրավունքներն իրացնեն»,- ասաց Կրպեյանը։

Նա համոզված է, որ այս իշխանությունները հրաժարվելու են թե հայկական արդար դատից, թե Արցախից, թե առհասարակ հայկական պետականությունից ու ինքնիշխանությունից։ Կարծում է, բոլորն արդեն վստահաբար դա գիտեն։

«Այս պահին բացի ազգային  իշխանությունից, ունենք ամեն ինչ՝ կամք, ռեսուրս, պատմություն, իրավական փաստաթղթային հիմք մեր իրավունքների համար պայքարելու ու այդ իրավունքներն իրացնելու համար, պարզապես այս պահին չունենք մեկ գաղափարի շուրջ համախմբած ազգային դաշտ ու այդ գաղափարը հայկական պետականության գոյությունն է, այդ գաղափարը մեր կենսական պատմական հայրենիքում մեր արժանապատիվ գոյությունն ապահովելու վճռականությունն է։ Որ պահին այդ համախմբումը հաջողեցինք... Բայց դա հեշտ չի։

Հասարակությանը պետք է հստակ պատրաստել այն շատ կարևոր ճակատամարտին, որը պետք է ապահովի հայկական պետականության հարևատումն ու հավերժական գոյությունը»,- ասաց Ասպրամ Կրպեյանը։