Ձեր վստահելի աղբյուրը

Երևան քաղաքի առաջին ատյանի ընդհանուր իրավասության քրեական դատարանում, դատավոր Մանվել Շահվերդյանի գլխավորությամբ, Աշոտ Փաշինյանի «առևանգման» գործով մեղադրյալ 44-օրյա պատերազմում զոհված Ժորա Մարտիրոսյանի մոր՝ Գայանե Հակոբյանի գործով նախնական դատալսումների ժամանակ պաշտպանական կողմը հայտարարեց, որ ընտրված խափանման միջոցը պետք է ընդհանրապես վերացվի։

«Բայց եթե դատարանը գտնի, որ պատշաճ վարքագիծը հնարավոր է ապահովել որոշակի խափանման միջոցի կիրառմամբ, ապա կխնդրեի դատարանը քննարկի և  տնային կալանքը փոխարինվի առավել մեղմ խափանման միջոցով»,- ասաց պաշտպաններից Հովսեփ Սարգսյանը։

Հանրային մեղադրողն ասաց, որ միայն բացառիկ խափանման միջոցն է  ի զորու ապահովելու մեղադրյալի պատշաճ վարքագիծն այս փուլում։

Պաշտպանն ասաց, որ հանրային մեղադրողի բերած փաստարկումներում չներկայացվեցին  որևէ փաստ, տվյալ, որոնք կարող էին վկայել, որ Գայանե Հակոբյանը կարող է դրսևորել ոչ իրավահպատակ վարքագիծ։  Նա խնդրեց, տիկին Գայանեի նկատմամբ կիրառել առավել թեթև, առավել մեղմ այլընտրանքային խափանման միջոց. «Խնդրում եմ Գայանե Հակոբյանի նկատմամբ կիրառված խափանման միջոց տնային կալանքը կամ վերացնել կամ փոխել ավելի մեղմ խափանման միջոցով։ Ուզում եմ, որպեսզի Գայանե Հակոբյանը այս դատական նիստերի դահլիճից... Ես դա ուզում եմ, կարծում եմ՝  հանրությունը ևս ուզում է ազատ դուրս գա հանրության մեջ»։

Գայանե Հակոբյանն ասաց. «Ես մայր եմ, ով ունի աշխարհի ամենաանասելի ցավը, որը երբեք չի ցանկանա ոչ մի մոր, նույնիսկ Աշոտի մորը։ Մենք, բառիս բուն իմաստով, ապրում ենք Եռաբլուրում։ Պետք չէ վախենալ Եռաբլուրից, քանի որ Եռաբլուրը սրբավար է, աղոթատեղի է, իսկ առևանգման ու նմանատիպ  բաների համար ավելի համապատասխան տեղ են ընտրում, ավելի լավ են պատրաստվում։ 

Այդ օրն ուղղակի հանդիպել եմ Աշոտին, միգուցե էմոցիոնալ եմ եղել, դեմ չեմ, ... Բայց ես երբևէ չեմ ցանկանում ոչ մի մոր նման բան, երբևէ ինձ թույլ չեմ տա, եթե ոմանք մոռանում են, որ ես ինչ եմ տվել այս երկրի համար, իմ հոգեվիճակը, ուղղակի ինձ թույլ չէի տա զուտ բարոյական տեսանկյունից»։

Նա նշեց, որ կոնկրետ Աշոտի հետ կապված որևէ անձնական խնդիր չկա, զուտ իր հոր կառավարության օրոք է այս ամեն ինչը տեղի ունեցել. «Հենց դրա հետ է կապված եղել, որ ասեմ՝ գնանք, ոչ մի վատ մտածված բան չի եղել։ Ուզել եմ, որ գնանք Եռաբլուր, որն իմ տունն է, սրբավայրը, իմ սրբավայրում չէր կարող վատ բան լինել։ Եթե վատ բան մտածեի, Եռաբլուրի անունն էլ չէի տայի, ոչ էլ կմտածեի գնալ Եռաբլուր»։ 

Աշոտ Փաշինյանն ասաց, որ սա հանրային անվտանգության հարց է։ 

«Դատախազությունը, դատարանը, քննչական կոմիտեն մարմիններ են, ովքեր պատասխանտու են հանրային անվտանգությանը, Հայաստանի բոլոր քաղաքացիներին ապահով ապրելու համար։ Իսկ այս իրավական պրոցները դրա երաշխիքներն են»,- ասաց Ա. Փաշինյանը։ 

Հիշեցնենք, որ Գայանե Հակոբյանը Աշոտ Փաշինյանի «առևանգման գործով» մեկ ամսով կալանավորվել է մայիսի 20-ին։ Այսօր ավելի վաղ հաղորդվել էր, որ Վերաքննիչ քրեական դատարանը  բեկանել է  Գայանե Հակոբյանի կալանքի դեմ նրա պաշտպանների բողոքն ու որոշել փոխել նրա խափանման միջոցը տնային կալանքով։