Ձեր վստահելի աղբյուրը

Գայանե Հակոբյանի պաշտպաններից Գիորգի Մելիքյանի համար դատարանի այսօր կայացրած որոշումն անակնկալ չէր։

«Առավոտից խաղ էր գնում՝ Վերաքննիչի որոշումից սկսած։ Պարզ է՝ այս որոշումը կայացվել է շատ ավելի վերևում, այլ ոչ թե դատարանում։ Մեր բարձրացրած իրավական խնդիրն այն էր, որ վարչապետի կողմից առկա է ուղղակի ազդեցություն դատարանի վրա։ Սա ապացուցվեց նաև այս դատավարության ընթացքում»,- ասաց պաշտպանը։

Լրագրողի ճշտող հարցին,թե ինչպես կապացուցի, որ եղել է ազդեցություն Փաշինյանի կողմից, պաշտպանն ասաց․

«Ինձ ապացուցել պետք չէ, ունենք փաստեր, կան տեսանյութեր, որտեղ նա հայտարարել է, որ ՀՀ-ում այդպիսի դատավոր չկա, որ վարչապետի ասածը չանի։ Մենք հրապարակեցինք նույն փաստական հանգամանքները դատարանում, մեղադրական եզրակացությւոնն ու այն բոլոր վարույթային գործողությունները, որոնք նաև դատարանում պետք է կատարվեին։ Բայց պարզ դարձավ, որ իրենք միայն Աշոտ Փաշինյան ունեին հարցաքննելու, իսկ  մնացածն իրեղեն ապացույցների հետազոտում է։ Հետևաբար խոչընդոտելու կամ նոր հանցանք կատարելու ռիսկն ինչպե՞ս կարող է  լինել հիմնավոր և առկա»։

Նրա պնդմամբ՝ դատախազի խոսքը դատարկախոսություն էր, առհասարակ որևէ փաստարկ չներկայացվեց։  

Հիշեցնենք, որ Գայանե Հակոբյանը Աշոտ Փաշինյանի «առևանգման գործով» մեկ ամսով կալանավորվել է մայիսի 20-ին։ Այսօր ավելի վաղ հաղորդվել էր, որ Վերաքննիչ քրեական դատարանը  բեկանել է  Գայանե Հակոբյանի կալանքի դեմ նրա պաշտպանների բողոքն ու որոշել փոխել նրա խափանման միջոցը տնային կալանքով։