Ձեր վստահելի աղբյուրը

«Ունենք մեծ քանակի դիմումներ, քանի որ այդ օրենքը երբ ընդունվեց, կար ավարտի հստակ ժամկետ, եթե չեմ սխալվում այն մինչև 2022 թվականի հունիս երկարացվեց և դիմումների քանակը 10.000 և ավել էր»,-ԱԺ մշտական հանձնաժողովների համատեղ նիստում պատասխանելով ապօրինի շինությունների օրինականացման դիմումների ընթացքի վերաբերյալ հարցին՝ հայտարարեց Երևանի փոխքաղաքապետ Լևոն Հովհաննիսյանը:

Նա հայտնեց, որ դիմումների մեծ հոսքի պատճառով ստիպված են եղել Երևանի քաղաքապետարանի Ճարտարապետության և քաղաքաշինության վարչությունում առանձին բաժին են ստեղծել, որը միայն զբաղվում է ինքնակամ կառույցների հարցով:

«Ես յուրաքանչյուր շաբաթ վիճակագրություն եմ ստանում այդ վարչությունից, այս պահի դրությամբ մենք ունեինք մոտ 5.000 ժամկետանց դիմում, դրանք նրանք են, որոնց մենք դեռ չենք պատասխանել, փաստաթղթերը չենք մշակել և արդեն 3.000-ի մասով քաղաքացիները արդեն ստացել են իրենց պատասխանները, մնացել է մոտ 2.000-ը»,-ասաց փոխքաղաքապետը:

Լևոն Հովհաննիսյանը հայտնեց, որ ունեն հանրային ձևով սահմանված ժամկետ՝ ընթացիկ տարվա օգոստոսի 1-ն է:

«Մենք մեր համաքաղաքացիներին խոստացել ենք, որ մինչև այդ ժամկետը, որևէ քաղաքացի չի լինի, որը սահմանված ժամկետում չի ստացել դրական, բացասական, կամ այլ պատասխան, օրինակ՝ դիմումում թղթերի պակասի վերաբերյալ»,-ասաց փոխքաղաքապետը: