Ձեր վստահելի աղբյուրը

«Ապրելու երկիր» կուսակցության Երևանի քաղաքապետի թեկնածուն Մանե Թանդիլյանն է։ Այս մասին որոշում է կայացրել կուսակցության քաղխորհուրդը։ Ասուլիսում կուսակցության քաղխորհրդի անդամ Տիգրան Սահակյանը հայտնեց, որ այս որոշումը հիմնված է եղել վերջին ամիսներին Երևանի բնակիչների հետ իրենց ակտիվ շփումների, նրանց հետ զրույցների, սոցոլոգիական հարցումների, ֆոկուս-խմբային հետազոտությունների արդյունքների և, իհարկե,  կուսակցության անդամների կարծիքների հիման վրա։

«Ուզում եմ տեղեկացնել, որ մենք հավատարիմ ենք մեր որդեգրած դիրքորոշմանը՝ այն է համապետական ընտրություններից զատ ակտիվորեն պատրաստվել և ամենայն լրջությամբ մասնակցել բոլոր տեղական ինքնակառավարման մարմինների ընտրություններին, քանզի վստահ ենք, որ տեղական ինքնակառավարման մակարդակում ևս քաղաքական ուժերը պետք է լուրջ քաղաքական ծրագրեր ներկայացնեն, ստանձնեն պատասխանատվություն և ընթացիկ օպերատիվ խնդիրներից զատ իրական զարգացում ապահովեն համայնքներում, այնպես, ինչպես մենք դա անում ենք Ալավերդի խոշորացված համայնքում, Նոյեմբերյան խոշորացված համայնքում, Տաթև խոշորացված համայնքում, և դա անելու ենք Երևան քաղաքում», - ասաց Տիգրան Սահակյանը։

Նրա խոսքով, Մանե Թանդիլյանի առաջադրումը ևս մեկ անգամ ընդգծում է իրենց վճռականությունը ոչ միայն մասնակցել, այլև հաղթել Երևանի ավագանու ընտրություններում։

«Հավաստիացնում եմ, որ այս ընտրություններում մեր մասնակցությունը և հաղթանակը երկրում արմատական և խորքային փոփոխությունների առաջնորդության անշրջելի հայտ է մեր կողմից», - ասաց Տիգրան Սահակյանը։