Ձեր վստահելի աղբյուրը

Հունիսի 7-ին ամերիկյան Associated Press գործակալությունը ծավալուն հոդված հրապարակեց այն մասին, որ Երուսաղեմի Հայկական թաղամասի 25 տոկոսը Երուսաղեմի հայոց պատրիարք Նուրհան Մանուկյանի գիտությամբ վաճառվել է ոմն գործարարի՝ հյուրանոց կառուցելու համար։

Այս լուրը ստանալուց հետո Նուրհան պատրիարքը կարգալույծ է արել Պարետ վարդապետ Երիցյանին, վերջինիս վերագրելով այս մութ գործարքը։ Սակայն Պաղեստինի ինքնավարության ղեկավար Մահմուդ Աբասը և Հորդանանի Աբդալլահ Երկրորդ թագավորը կասեցրել են պատրիարքի իշխանության ճանաչումը։

Այս ամենը ունի ներհայաստանյան շատ հետաքրքիր համատեքստ։

Ի մասնավորի, դեռ 2016թ օգոստոսին՝ այսինքն Ապրիլյան պատերազմից ու «Սասնա ծռեր» խմբավորման ահաբեկչական գործողությունից հետո, երբ հասարակության մեջ անորոշությունները, ինչպես այժմ, լեցուն էին, «Հայկական ժամանակ» թերթը տպագրել էր դրանից մեկ-երկու տարի առաջ նույն Նուրհան Պատրիարքի կողմից Մայր Աթոռ ուղարկված գրությունը, որտեղ վերջինս՝ միայն իրեն հայտնի պատճառներով կոչ էր արել Ամենայն Հայոց Կաթողիկոսին հրաժարվել գահից։

Ավելին. 2014թ նոյեմբերին այն ժամանակ հակաիշխանական կեցվածքով հայտնի որոշ լրատվամիջոցներ հրապարակումներ էին անում Մայր Աթոռի ու Երուսաղեմի հարաբերությունների լարվածության վերաբերյալ։ Ըստ հաստատված լուրերի, խնդիրն այն էր, որ Ամենայն Հայոց Կաթողիկոսը հրաժարվել էր եպիսկոպոս ձեռնադրել Երուսաղեմի կողմից ներկայացված երկու թեկնածուներից մեկին։ Այդ մեկը՝ Պարետ Ծ. վարդապետի Երիցյանն էր։ Ենթադրաբար նույն մարդը, ով հիմա ամբաստանվում է Երուսաղեմի Պատրիարքի կողմից «Կովերու պարտեզի» վաճառքի գործարքի համար։ Գարեգին Երկրորդն իր 2014թ նամակում գրել էր ընդամենը, որ «վերապահումներ կան» և հորդորել էր Երուսաղեմին զբաղվել մանրամասներով։

Տարիներ անց, երբ իշխանափոխությունից հետո մերձիշխանական ինչ որ խմբակ սկսել էր Ամենայն Հայոց Կաթողիկոսին գահընկեց անելու նոր արշավ՝ վերջիններս՝ նորընծա իշխանական մամուլի ակտիվ աջակցությամբ տարածում էին տարիներ առաջ իրենց իսկ կողմից հրապարակված Նուրհան Պատրիարքի նամակը, թյուրիմացության մեջ գցելով մարդկանց... Ավելին, այն ժամանակ հակաեկեղեցական շարժման ակտիվիստները նույնիսկ կոչ էին անում «գալ ու տեր կանգնել Եկեղեցուն», բաց նամակներ գրում նրան։

Նույն թվականի՝ 2018թ դեկտեմբերին Նուրհան պատրիարքը նույնիսկ շնորհավորական ներբողներ էր գրում Նիկոլ Փաշինյանին։

Հետաքրքրական է, որ 2021թ նոյեմբերին Մայր Աթոռում Գերագույն հոգևոր խորհուրդը քննարկել է Երուսաղեմի Հայոց պատրիարքարանի կողմից «Կովերի պարտեզ» կալվածքի վարձակալության հանձնելու խնդիրը և կոչ էր արել չեղարկել այդ որոշումը։ Պետականամետ իշխանություն ունենալու պարագայում կառավարությունը ու նրա ղեկավարը անմիջապես կսկսեր զբաղվել այս թեմայով, բայց Սփյուռքի կարողությունների ջլատման քաղաքականությունը թերևս այլ առաջնահերթություններ է թելադրում Փաշինյանին՝ հատկապես, երբ խոսքը գնում է իր «սրտի հոգևորականների» մասին։

Երուսաղեմի հայկական կալվածքների ուղիղ 25 տոկոսի վաճառքը՝ առնվազն 2016 թվականից Հայ Եկեղեցու դեմ արշավի գործիքներից մեկի՝ Նուրհան պատրիարքի կողմից ու նրա նկատմամբ աջակցությունը գործող իշխանությունների կողմից պարզապես տրամաբանական արտացոլումն է այսօրվա կառավարության նպատակների։

Սևունց