Ձեր վստահելի աղբյուրը

Իսրայելի վարչապետ Բենիամին Նեթանյահուն հայտարարել է, որ երկրի իշխանությունները պատրաստ են ռազմական լծակներ օգտագործել Իրանի միջուկային ծրագրի զարգացումը զսպելու համար։

«Ես չեմ կարծում, որ միայն դիվանագիտությունը կաշխատի: Կարծում եմ, դիվանագիտությունը կարող է աշխատել միայն այն դեպքում, երբ համակցված է իրական ռազմական սպառնալիքի կամ ռազմական տարբերակների դիմելու պատրաստակամության հետ, եթե զսպումը չաշխատի: Իրանը բացահայտորեն հավատարիմ է Հոլոքոստը կրկնելուն և վեց կամ յոթ միլիոն հրեաներ սպնոլ Իսրայելում: Մենք չենք պատրաստվում ձեռքերը ծալած նստել և ոչինչ չանել, և թույլ տանք, որ նրանք դա անեն: Եթե այաթոլլաները կարծում են, որ կարող են սպառնալ մեզ միջուկային հոլոքոստով, նրանք սխալվում են: Մենք կանենք այն ամենը, ինչ անհրաժեշտ է ինքներս մեզ պաշտպանելու համար»,-ՏԱՍՍ-ի փոխանցմամբ՝ այդ մասին ասել է նա բրիտանական Sky News հեռուստաալիքին տված հարցազրույցում։

Նեթանյահուն նաև հույս է հայտնել, որ Իսրայելի և Սաուդյան Արաբիայի միջև հարաբերությունները շուտափույթ կկարգավորվեն։

«Մենք մեծ հնարավորություն ունենք նպաստելու մեր տարածաշրջանում, մեր երկու երկրների միջև խաղաղությանը, մեր ժողովուրդների բարեկեցությանը: Կարծում եմ, որ սա կփոխի պատմությունը: Մենք արդեն պատմական քայլ ենք կատարել՝ ստորագրելով չորս խաղաղության պայմանագիր «Աբրահամի համաձայնագրի» շրջանակներում, որոնց իմ ղեկավարությամբ ենք հասել ԱՄԷ-ի, Բահրեյնի, Մարոկկոյի և Սուդանի հետ»,-ընդգծել է նա և հավելել. «Ակնհայտ է, որ Սաուդյան Արաբիայի հետ համաձայնագիրը քվանտային թռիչք կլինի, քանի որ այն ամենաազդեցիկ արաբական երկիրն է ոչ միայն արաբական, այլև իսլամական աշխարհում: Հետևաբար, կարծում եմ, որ դա հնարավորություն կստեղծի. արաբա-իսրայելական հակամարտությունը դադարեցնելու համար և կօգնի լուծել պաղեստինա-իսրայելական հակամարտությունը»։