Ձեր վստահելի աղբյուրը

ՀՀ վիճակագրական կոմիտեի  հրապարակած վերջին տվյալներով Հայաստանում  2023թ. մայիսին 2022թ. նույն ամսվա համեմատ ալյուրի գինը նվազել է 10.4%-ով, սակայն այդ նույն ժամանակահատվածում հացի գինը նվազել է 0.2%-ով: Նախորդ տարիներին արձանագրված գնաճի աննախադեպ ֆոնին ալյուրի գրանցված նման գնանկումը շարքային սպառողն այդպես էլ չի զգում: Միտումը մեկնաբանելու խնդրանքով Panorama.am-ը դիմեց «Իրազեկ և պաշտպանված սպառող» ՀԿ նախագահ Բաբկեն Պիպոյանին:

«Գործ ունենք իրար հավասար, եթե նույնիսկ հավասար չեն, ապա կարևորությամբ հավասար գործոնի հետ, այնպիսին, որ առանձին-առանձին իրավունք չունենք դիտարկել,:

Առաջին՝ ըստ էության շուկան գնային տեսանկյունից չի վերահսկվում, իսկ հացն այն սպառման ապրանքն է, որի գնի իջեցումը դինամիկայի տեսանկյունից ավելի դանդաղ է տեղի ունենում: Սա առաջին գործոնը՝ չկա վերահսկողություն և ինքնակարգավորման տեսանկյունից նոր խաղացողներ ի հայտ գալը, որոնք գին կզսպեն, դժվար կլինի:

Երկրորդ գործոնն էլ այն է, որ մենք իրավունք էլ չունենք ուղիղ համեմատություն անելու ալյուրի և հացի գնի միջև, որովհետև հացի ինքնարժեքի մեջ ալյուրը ունի մեծ տեսակարար կշիռ, բայց ամբողջությամբ ալյուրը չէ, որ ձևավորում է հացի ինքնարժեքը: Սկսած էլեկտրաէներգիայից, ջրից, վերջացրած բարելավիչներով, որոնք օգտագործվում են և, ի վերջո, կարևոր գործոնը՝ աշխատուժը, ազդում են հացի ինքնարժեքի վրա և չի բացառվում, որ, օրինակ, ալյուրի գինը նվազի, իսկ հացի գինն անգամ թանկանա:

Բայց այլ հարց է, որ մեր երկրում չկա պատշաճ հսկողություն, անգամ գործառութային իմաստով երևի թե բարդ խնդիր է, քանի որ գերիշխող դիրք ունեցող ընկերություններ չկան: Այստեղ կարող ենք ապավինել բացառապես մի քանի բարեխիղճ տնտեսվարողի վրա, որոնք գերշահույթներ հետապնդելու փոխարեն, թափանցիկ կներկայացնեն հացի գնի իջեցման հնարավորությունը և ոչ միայն կներկայացնեն, այլ նաև կանեն, դրանից հետո արդեն հեշտ կլինի պնդումներ անել»,-ասաց Բաբկեն Պիպոյանը: