Ձեր վստահելի աղբյուրը

ԱՄՆ Ֆլորիդա նահանգի դաշնային խորհուրդը մեղադրանք է առաջադրել նախկին նախագահ Դոնալդ Թրամփին՝ Սպիտակ տնից հեռանալուց հետո պետական գաղտնի փաստաթղթեր պահելու համար:

Արդարադատության նախարարությունը ծանուցել է Թրամփի փաստաբաններին մեղադրանքի մասին․ նախկին նախագահն այդ մասին տեսաուղերձ է հրապարակել սոցցանցերում, գրում է «Ամերիկայի ձայն»-ը։

«Շատ ցավալի է։ Նրանք գնում են ժողովրդական նախագահի հետևից։ Նախագահ, ով ավելի շատ ձայներ է հավաքել, քան կենդանի որևէ նախագահ։ Սա շարունակվում է յոթ տարի։ Նրանք չեն կարող կանգ առնել: Ես անմեղ եմ»,-հայտարարել է Թրամփը։

Թրամփի փաստաբան Ջեյմս Թրասթին «CNN»-ին փոխանցել է, որ մեղադրանքները վերաբերում են երկրի պաշտպանությանն առնչվող գաղտնի տեղեկատվության կանխամտածված պահպանմանը, կեղծ հայտարարություններին և դավադրությանը:

Սպասվում է, որ նախկին նախագահը կներկայանա Մայամիի դաշնային դատարան: Ըստ «AP» գործակալության, Թրամփի դեմ մեղադրանքը ներառում է յոթ կետ:

Այսպիսով, Թրամփն ԱՄՆ առաջին նախկին նախագահն է, ում մեղադրանք է առաջադրվել դաշնային դատարանում։

Անցած տարվա օգոստոսին տեղի ունեցած խուզարկության արդյունքում նրա մոտ հայտնաբերվել է ավելի քան հարյուր գաղտնի փաստաթուղթ: Թրամփի պնդմամբ, փաստաթղթերի հետ կապված որևէ խախտում թույլ չի տրվել:

Յոթ կետից բաղկացած մեղադրական եզրակացությունը, որը չի հրապարակվել, Թրամփին մեղադրում է նաև դաշնային օրենքները խախտելու մեջ, որոնք արգելում են «ազգային պաշտպանության տեղեկատվության» չարտոնված պահպանումը, ինչը ենթադրում է մինչև 10 տարվա ազատազրկում:

Մեղադրական եզրակացությունը, թեև լուրջ հարված է Թրամփին, սակայն չի արգելում նրան երկրորդ անգամ ընտրվել։