Ձեր վստահելի աղբյուրը

«ՀայաՔվե» նախաձեռնող խումբը հավաքել է Կենտրոնական ընտրական հանձնաժողովի համար նախատեսված ողջ փաթեթը և այն այսօր հանձնեց ԿԸՀ։

Նախքան ԿԸՀ մտնելը հասարակական-քաղաքական գործիչ Ավետիք Չալաբյանը լրագրողներին ասաց, որ «Հանրաքվեի մասին» օրենքի 13-րդ հոդվածը նախատեսում է, որ քաղաքացիական  նախաձեռնության կարգով նախաձեռնող  խումբը կարող է դիմում ներկայացնել ԿԸՀ և դրանով նախաձեռնել օրենսդրական նախագծի ներկայացում Ազգային ժողով։

«Մենք եկել ենք այդ դիմումը ներկայացնելու ԿԸՀ։ Այն իր մեջ ներառում է փաստաթղթերի բավականին մեծ փաթեթ։ Նախ դիմումը, որը ստորագրված է  նախաձեռնող խմբի անդամների կողմից և վավերացված է նոտարական կարգով, բուն օրենքի նախագիծն ու հիմնավորումները»,- ասաց նա։

Ա. Չալաբյանը հայտարարեց, որ այժմ այդ փաթեթը պետք է պաշտոնապես ներկայացնեն ԿԸՀ և դրանով պաշտոնական մեկնարկ կտան «Հայաքվե»-ին։

Նա մանրամասնեց, որ օրենքը նախատեսում է  ԿԸՀ-ն տաս օրվա  ընթացքում պետք է պատասխան տա, ենթադրաբար դրական պատասխան, բայց երբեք չի կարելի բացառել, որ կարող է նաև բացասական պատասխան լինել. «Եթե բացասական լինի՝ կամ պետք է փաստաթղթերի  մեջ ճշգրտում մտցնենք, եթե սխալ կա, կամ եթե մենք տեսնում ենք ոչ մի սխալ չկա փաստաթղթերում ու մերժումը արհեստական է, այդ դեպքում կդիմենք վարչական դատարան։

Ենթադրաբար՝  տաս օրվա ընթացքում դրական պատասխան տան, ստորագրահավաքը կսկսվի այս պահից սկսած մոտավորապես տաս օրից»։

Նա հայտնեց, որ ստորագրահավաքը, ըստ «Հանրաքվեի մասին» օրենքի, նախատեսում է, որ ստորագրահավաքը կարող է տեղի ունենալ համայնքապետարանների, մարզպետարանների, թաղապետարանների, գյուղապետարանների,  նոտարական գրասենյակների տարածքում, ինչպես նաև ստորագրողները եթե ունեն էլեկտրոնային ստորագրություն, կարող են մասնակցել ստորագրահավաքին անհատական ստորագրության միջոցով։

Հարցին՝  կարծում են, որ այս գործընթացները կկասեցնե՞ն այն բանակցությունների ընթացքը, որ  այս իշխանությունները տանում են, Ավետիք Չալաբյանն ասաց. «Մենք չենք  կարծում, որ առանձին վերացրած մի որևէ  գործողություն կարող է մեր պատմության ընթացքը փոխել։ Մենք համոզված ենք, որ պետք է լինի  գործողությունների համախմումբ և ռազմական, և քաղաքական, և քաղաքացիական  անհնազանդության ոլորտներում, և Արցախի  բնակչության կողմից վճռականություն ցույց տալու և  դիմադրելու ոլորտում։ Դրանք բոլորը  միասնականության մեջ պետք է դիտարկել։

Այսօր գալով այստեղ և ներկայացնելով այս դիմումը,  մենք բնավ չենք ենթադրում, որ սա միակ գործողությունն է, որ  հայ ազգը պետք է իրականացնի, որպեսզի  կանխի Արցախի հանձնումը թշնամուն։ Բնավ ոչ, բայց դա այն գործողություններից մեկն է, որը շատ էական կարող է լինել, դրա հիմնական պատճառն այն է, որ  այս գործողությունն իրականացվում է  սահմանադրական դաշտում,  բացարձակ ժողովրդավարական դաշտում, սա ուղիղ  ժողովրդավարության օրինակ է, որը Հայաստանում երբևէ չի կիրառվել»։

Նա ասաց, որ իրենք ուզում են ապացուցել և մեր բնակչությանը, և  այսօրվա գործող և արդեն  ոչ լեգիտիմ դարձող  իշխանություններին, և նրանց արտասահմանյան հովանավորներին, որ Հայաստանում բնակչությունը չի աջակցում տարվող քաղաքականությունը և այդ չաջակցելը  ոչ թե պարզապես խոսակցության, սոցիոլոգիական հարցումների մակարդակով է, այլ  վճառական «ոչ»-ի տեսքով է, որ մարդիկ գալիս են ու բաց քվեարկությամբ իրենց բողոքն են արտահայտում։

Ա. Չալաբյանն ասաց, որ այս նախաձեռնության հետ կապված Արցախից շատ դրական արձագանքներ են ստացել։

«Մենք  «Արցախի անվտանգության և զարգացման ճակատի» հետ համագործակցության հուշագիր ունենք, իրենք համարում են կարևորագույն նախաձեռնություններից մեկն է, որով Հայաստանի բնակչությունը կարող է իր վճռական խոսքն ասել Արցախի հայկականությանը պահպանելու խնդրում»,- նշեց նա։

Հարցին՝  հնարավո՞ր է խոչընդոտեն մարզպետարանները, համայնքապետարանները, Ա.Չալաբյանն ասաց. «Այո, հնարավոր է, չենք էլ կասկածում, որ նման խոչընդոտներ կարող են առաջանալ, բայց մյուս կողմից էլ այդ խոչընդոտներից չենք էլ վախենում, դրանց հաղթահարելու լավագույն միջոցն այս նախաձեռնության համաժողովրդական բնույթն է, ինչքան շատ մարդ դրան մասնակից, այնքան ավելի մեծ հավանականությամբ մենք այս գործընթացը հաջողությամբ ավարտին կհասցնենք։

Եթե այս իշխանությունները փորձեն վարչական մեթոդներով մեզ խոչընդոտել, մենք էլ կմտածենք, թե ինչ մեթոդներով այդ խոչընդոտները  շրջանցել։ Կառաջարկեի այս իշխանություններին  ընդհանրապես չփորձեն խոչընդոտել»։

Ա. Չալաբյանի խոսքով, սոցիոլոգիական հարցումները ցույց են տալիս, որ բնակչության 90  տոկոսը դեմ է  Արցախի հանձնմանը։ 

«Ո՞նց եք պատերացնում, ո՞նց է այս իշխանությունը հանրավքեի բերելու մարդկանց և  ստիպելու, որ  քվեարկեն Արցախի հանձնման օգտին։ Դա անհնար է, չեմ պատկերացնում։
Չի կարող  իշխանությունը հանրաքվեն օգտագործել Արցախը հանձնելու համար։ Չի կարող, դա բացառում եմ։ Ընդհակառակը, մենք  պետք է հանրաքվեն օգտագործենք, որպեսզի դելեգիտիմացնենք այս իշխանությունը Արցախի  հանձնումը, արգելենք իրենց Արցախը հանձնել»,- ասաց Ա.Չալաբյանը։

Իրավաբան Արամ Պետրոսյանը ներկայացվեց, թե ինչ օրենքի նախագծեր են ներկայացնում։ Առաջարկվում է երկու հոդվածով լրացում կատարել Քրեական  օրենսգրքում.

Առաջինը՝ «Հայաստանի Հանրապետության անունից Արցախը  որևէ այլ պետության կազմում ճանաչելը  պատժվում է ազատագրկմամբ 10-15 տարի ժամկետով»։

Երկրորդ՝ «Հայոց  ցեղասպանության ճանաչումից հրաժարվելը, Հայոց ցեղասպանությունը  հրապարակայնորեն հերքելը, արդարացնելը կամ դրա  վտանգավորությունը նսեմացնելը»։

Նա ասաց, որ իրենց նախաձեռնությունը միացած 66 քաղաքացիների անձնագրերի պատճեներով ու մնացած անհրաժեշտ փաստաթղթերով այժմ փաթեթը կհանձնեն ԿԸՀ։

Իրավաբանը հայտնեց, որ օրենքով սահմանված ժամկետը  մինչև 60 օր է  50 հազար ստորագրություն հավաքելու համար։ Նա հույս ունի, որ իրենք 15-20 օրում կհավաքեն այդ ստորագրությունները, որից հետո կդիմեն ԿԸՀ, ստորագրությունների վավերականությունը կհաստատվեն, հաջորդ փուլում կդիմեն ԱԺ։