Ձեր վստահելի աղբյուրը

«Ես ասում եմ, որ իմ ընկալմամբ, համադրելով փաստերը, Թուրքիայի նորընտիր նախագահի՝ Բաքու ժամանելն է հանդիպման հետաձգման պատճատն: Ըստ իս, դա է»,-ճեպազրույցի ժամանակ ասաց ԱԺ նախագահ Ալեն Սիմոնյանը և պնդեց, որ Վաշինգտոնում ԱԳ նախարարների հանդիպման հետաձգման պատճառը հակասությունները կամ պրոցեսները չեն կարող լինել, դրանք շարունակվում են՝ մի քանի հարթակով:

Նա անդրադարձավ նաև տարածաշրջանային հաղորդակցության ուղիների ապաշրջափակման գործընթացում առկա տարաձայնություններին:

«Ընդհանուր ընկալում կա, բայց տարաձայնությունները տեխնիկական են, օրինակ, խոսքը գնում է մի պետության մեջ տեղաշարժման մասին: Ադրբեջանի դիրքորոշման մեջ հիմնական կարմիր գիծն այն է, որ նա իր երկիրից երրորդ երկիր չի տեղափոխվում Բաքվից Նախիջևան գնալուց: Բաքվի պատկերացմամբ, այն ենթադրում է, որ մենք պետք է  այլ տարբերակ հասկանանք, օրինակ՝ հեշտացված կամ այնպես,  ինչպես Նախիջևանի տարաքծով մենք իջնենք Մեղրի, այլ հարց է, թե մեզ որքանով է այդ ճանապարհը պետք»,-ասաց Սիմոնյանը և հավելեց, որ Հայաստանը կողմնակից է բոլոր ճանապարհների ապաշրջափակմանը:

Ըստ ԱԺ նախագահի՝ եթե լարված իրավիճակում են երկու երկրները ապրելու, ապա այդ ճանապարհն անիմաստ է լինելու և լավ կլինի, որ այն Ադրբեջանը հասկանա:

Անդրադառնոլով Արցախից իշխանությունների հրաժարվելու մասին հարցին՝ Ալեն Սինոյնանն ասաց. «Հիմա մենք բերել ենք Արցախը ինչ-որ կարգավիճակով, ինչ-որ ձևով , ինչ-որ ֆորմատով փորձում ենք հասնել նրան, որ բանակցությունների մաս դառնա, բայց դրա մասին ոչ մեկը չի խոսում, հակառակն են ասում: Եթե այդ հարցը չլիներ խաղաղության պայմանագիրն արդեն 3-4 անգամ կնքել էինք»,-հայտարարեց Սիմոնյանը:

Նրա կարծիքով, Ադրբեջանը փորձում է ստեղծված իրավիճակից հնարավորինս ավել ստանալ, որը հասկանալի է:

«Իրենք չեն ուզում կրկնել այն սխալները, որոնք մենք 90-ականներին ունեցել ենք: Միևնույն ժամանակ, իմ գնահատմամբ, իրենք իրենց սխալներն են անում և շատ բաներ հաշվի չեն առնում»,- հայտարարեց նա:

Մեկնաբանելով ՔՊ-ի վարկանիշի անկման մասին հարցին Ալեն Սիմոնյանն ասաց. «Ես վստահ եմ, որ եթե եկող շաբաթ նոր ընտրություններ լինի, ՔՊ-ն ավելի շատ ձայն կհավաքի, քան պատերազմից հետո: Մոռանում եք, որ պատերազմից հետո, որն ամենամեծ ցավն էր մեր բոլորի համար, մենք 54 % ձայն հավաքեցինք, ո՞վ էր դրան հավատում»: