Ձեր վստահելի աղբյուրը

«Այս օրենքը մի շարք մարզերում իրականության հետ որևէ աղերս չի կարող ունենալ, որովհետև սպանդանոցների թիվը շատ քիչ է և դրանց պայմանները հեռու են բավարար լինելուց»,-խորհրդարանում հայտարարեց «Հայաստան» խմբակցության պատգամավոր Գեղամ Նազարյանը:

Մինչ այդ Տեսչական մարմինների աշխատանքների համակարգման գրասենյակի ղեկավարի պարտականությունները կատարող Արմեն Դանիելյանը ներկայացրեց «Անասնաբուժության մասին» և «Սննդամթերքի անվտանգության պետական վերահսկողության մասին» օերնքում փոփոխություններ և լրացումներ կատարելու մասին օրենքի նախագիծը, որով հանրային սննդի օբյեկտներին պարտադրվում է իրացնել բացառապես սպանդանոցային ծագման մսամթերք, իսկ ոչ սպանդանոցային մորթը թույլատրել միայն որսորդության, ձկնորսության և եկեղեցա-ծիսական արարողությունների ժամանակ:

Ըստ օրինագծի՝ ոչ սպանդանոցային մսամթերք հայտնաբերելու դեպքում, այն ամբողջությամբ կոչնչացվի տվյալ տնտեսվարողի միջոցներով:

Գեղամ Նազարյանը հայտնեց, որ գյուղացիների, այդ թվում նաև մսի վաճառքի խանութների սեփականատերերի մոտ իշխում է այն կարծիքը, որ սպանդանոցներն առաջարկում են հիմնականում ծերացած անասունի մսամթերքը:

«Վաճառականները նախընտրում են գնել մասնավորից՝ իմանալով մսի իրական որակը»,-հայտնեց Նազարյանը:

Արմեն Դանիելյանը հայտնեց, որ այսօրվա գործող կարգավորումները պարտադրում են սպանդանոցային ծագման մսի իրացում:

«Ընդունված օրենքը դեռևս 2016 թվականից չի գործում և այն նորմա՞լ եք համարում, սակայն մեր տեսանկյունից օրենքի խիստ կիրառությունը հանրային լայն զանգվածի առողջապահության համար է նախ և առաջ կարևոր»,-ասաց տեսչական մարմնի գրասենյակի ղեկավարը և հավելեց. «2018 թվականից սկսած սպանդանոցների թիվն աճել են և ինչ-որ պահից թույլատվություն ունեցող սպանդանոցները սկսել են այլևս գործունեություն չիրականացնել, ինչը պայմանավորված է նրանով, որ քաղաքացիները նախընտրել են առանց սպանդանոցի մսի վաճառքն իրականացնել»:

Հայտնելով, թե սպանդանոցային մսի առկայության պարտադրումը ոչ միայն սննդի անվտանգությունն է ապահովում, այլև՝ արդար մրցակցային միջավայր՝ Դանիելյանն ասաց. «Սպանդանոցային գոծունեություն իրականացնելու համար ծախսեր իրականացրած տնտեսվաողները եկամուտ պետք է ակնկալեն»:

Գեղամ Նազարյանը հայտնեց, որ հերթական անգամ օրենք է ընդունվում, որը հնարավոր է կիրառել որոշ մարզերում և չի կիրառվելու այլ մարզերում:

Արմեն Դանիելյանն էլ պատասխանեց, թե կառավարության որոշումներով նախատեսվում է կարգավորել մսի հետագծելիության վերահսկողության մեխանիզմները և այսօր էլ QR կոդրերով հնարավոր է որոշել մսի ծագումը և, խանութից պահանչելով, Ձև-5 փաստաթուղթը, կարող են պարզել մսի ծագումը:

«Այսօր արդեն փոփոխություն է անցկացվում և սպանդանոցին պարտադիր պահանջ է առաջադրվում մեքենա ունենալ անասունին տեղափոխելու  համար  և իրենք պարտավորված են լինելու գյուղացու տնից այդ անասունը տեղափոխել սպանդի վայր»,-ասաց Դանիելյանը և շեշտեց, որ ոչ պատշաճ վարչարարությունն է պատճառը, որ գյուղացիները չեն ցանկանում սպանդանոցներից օգտվեն: