Ձեր վստահելի աղբյուրը

Քաղաքական վերլուծաբան Վարդան Բալյանը գրում է.

«Մեր բանակը 2016 թվականի Ապրիլյան քառօրյա ընթացքում բառի ուղիղ իմաստով ջարդուփշուր է արել ադրբեջանական հարձակվող զորքին:

Թարթառի գործով Ադրբեջանում աղմկահարույց բացահայտումների արդյունքում հանրային հարթակում հրապարակային են դառնում թշնամու իրական կորուստների մասին տվյալներ, որոնք բազմակի ավելի են պաշտոնականից: 2900-ից ավելի սպանված, միայն Թալիշի և Մատաղիսի հատվածում 600-ից ավելի:

Թարթառի գործով ընթացող դատաքննության ընթացքում տուժածների փաստաբանները միջնորդություն են ներկայացրել որպես վկա դատակոչել Գլխավոր շտաբի նախկին պետ Նաջմեդին Սադիքովին: Աղմկահարույց այս պատմության մանրամասներին առաջիկայում ավելի հանգամանալից կանդրադառնանք գրառումների շարքով, քանի որ բացահայտումները վերաբերում են Ապրիլյան քառօրյային, ինչպես նաև հանգամանքների, որոնք ուղղակի կամ անուղղակի կապ ունեն 44-օրյա պատերազմի հետ»։

Ի պատասխան 2900 թիվը կասկածի տակ դնող մեկնաբանությունների՝ Բալյանը գրում է.

«Տվյալները ես չեմ հորինում, հաստատել կամ հերքել չեմ կարող, քանի որ հասկանալի պատճառներով ապացույցները լրիվությամբ չեն հրապարակայնացվում: Մատաղիս-Թալիշ հատվածում իրենց կորուստների թվային տվյալները մենք ուսումնասիրել ենք, հաստատվում են բազմաթիվ, իրարից անկախ աղբյուրներով»։