Ձեր վստահելի աղբյուրը

Ազգային ժողովում կառավարության հետ հարցուպատասխանի ժամանակ ՔՊ-ական պատգամավոր Հասմիկ Հակոբյանը իր մտահոգությունը հայտնեց օրերս լսած մի հարցազրույցի հետ կապված։ Նա  ասաց, որ «Հայաստան» խմբակցության պատգամավոր, ՀՅԴ նախկին անդամ Աղվան Վարդանյանի հարցազրույցն իրեն որպես քաղաքացի, թիմի անդամ, անհանգստացրել է։ Նա մեջբերում արեց. «Նա ասել է, որ ձեր (նկատի ունի Նիկոլ Փաշինյանի-Panorama.am) պաշտոնավորումը դադարեցնելու համար  անհրաժեշտ է 100 տղամարդ, որոնց Վարդանյանն անվանում է քաղաքական մահապարտներ, որոնք մինչև վերջ կկանգնեն, պատրաստ կլինեն մեռնել, որպեսզի երկիրն ազատեն այս չարիքից։  Այդ մարդիկ պետք է ռազմական ռեժիմով գործողությունների պլանը ձևակերպեն ու գնան մինչև վերջ»։

Այնուհետև նա հարց ուղղեց Նիկոլ Փաշինյանին. «Սա արդեն ոչ միայն հայտարարություն է, այլ նաև գործողություն, քանի որ նա արդեն այդ 100 մահապարտներից անուններ ունի, որոշակի հանդիպումներ է իրականացնում։ Ցանկանում եմ մեր ուժային  կառույցներին  հորդորել զգոն լինեն այս թեմայի հետ կապված, ուսումնասիրեն հարցազրույցում  հնչող հայտարարությունները։ Կցանկանայի ձեր մեկնաբանությունը լսել մեր երկրում տեղի ունեցող այդ  գործընթացի վերաբերյալ, քանի որ մենք ոչ վաղ անցյալում հենց այս դահլիճում ականտեսը եղել ենք  տարբեր մահապարտների ռազմական գործողությունների պլանով գործողությունների»։ 

Նիկոլ Փաշինյանն ասաց, որ այդ հարցն իրեն ուղղված չէ, այդ հարցով ավելի շատ պետք է զբաղվի գլխավոր դատախազությունը, որն իրավասու մարմինն է։

«Ինչ վերաբերում է մահապարտներին, պետք է հույս հայտնել, որ  այդ մահապարտների ցուցակում 44-օրյա պատերազմի դասալիքների հատուկ ստորաբաժանում կլինի՝ այդ խնդիրը լուծելու համար։ Կարծում եմ՝ «ադապտացիայի» ճիշտ մեթոդ են գտել։ Ենթադրում եմ, որ այդ ուղղությամբ էլ աշխատանքներ կան։

Մեր քաղաքական ուղեգիծը հետևյալն է՝ օրենքի գերակայություն և օրենքի դիկտատուրա։ Դա մեր նախընտրական թեզն է։ Բոլոր նրանք, ովքեր օրենքի գիծը կհատեն, ուրեմն օրենքով նախատեսված ուղիներով կգտնեն իրենց տեղը այս կյանքում», - նշեց Ն.Փաշինյանը։

Հասմիկ Հակոբյանը նաև ասաց, որ  անհանգստանցող է պարոն Վարդանյանի հայտարարության այն մասը, որ  Արցախի հետ կապված հարցի հանգուցալուծումն էլ է տեսնում նույն ճանապարհով, այսինքն էլի քաղաքական մահապարտների խմբով տարբեր գործողություններ իրականացնելով։

«Եթե Արցախում սա լի է նաև պատերազմի վտանգով, Հայաստանում նաև քաղաքական լարումներ կբերի, ինչու ոչ՝  քաղաքացիական պատերազմ»,- ասաց ՔՊ-ական պատգամավոր։

Ն. Փաշինյանն ասաց, որ առաջիկայում քննիչ հանձնաժողովում ԼՂ հարցի բանակցային գործընթացի, մի շարք այլ իրադարձությունների վերաբերյալ մանրամասն խոսակցություն կլինի։

«Եթե մահապարտների ջոկատ կազմող էին, իրենք էին ընդունել այն սկզբունքները, որոնցով ԼՂ-ն ճանաչել են Ադրբեջանի մաս։ Ուրիշ բան՝ գնացել են, դրսում ճանաչել են, ներսում եկել, մահապարտի ջոկատներ են կազմել, իսկ այդ մահապարտ ջոկատները,  ձեր նշած մարդու նման, նախարարական կաբիներտներում նստած՝ զբաղված էին եղել բոլորովին այլ խնդիրների լուծմամբ։

Ես կառաջարկեի այդ հացին քաղաքական մեկնաբանություններ շատ չանեին, այդ հարցին պետք է արձագանքնեն իրավապահները՝ Հայաստանի օրենսդրությամբ սահմանված կարգով»,- ասաց Փաշինյանը։