Ձեր վստահելի աղբյուրը

«Դժվար է Հայաստանում գտնել ավելի քաղաքական մարդ, քան Արմեն Աշոտյանն է, նրան ես համարում է Հայաստանի քաղաքական բրենդներից մեկը, դժվար է ուրիշ գնահատական տալ այս գործին, քան քաղաքական հետապնդումը»,-Արմեն Աշոտյանի դատական նիստի ընդմիջմանը դատարանի առաջ հայտարարեց «Վետո» շարժման ղեկավար Նարեկ Մալյանը:

Նա կանխատեսեց, որ ռեպրեսիաների ալիքը գնալով սաստկանալու է, իսկ այն երկրները և կառույցները, որոնք ժողովրդավարություն էին խաղացնում տասնյակ տարիներ, կանաչ լույս են տվել գործող իշխանություններին՝ ամենակոշտ, ամենալկտի ռեպրեսիաների առումով,  վտանգավոր քաղաքական այլախոհներին լռեցնելու, չեզոքացնելու, վտանգավոր մրցակիցներին ոչնչացնելու, ինչպես նաև սպանելու համար՝ ինչպես Արմեն Գրիգորյանի դեպքում:

«Գործող իշխանությունները մարսել են նաև հղի կնոջը մեքենայի տակ գցել, սպանելը և կմարսեն Արմեն Աշոտյանին, ինձ ճաղավանդակների հետևում տեղավորելու խնդիրը»,-ասաց Մալյանը և հավելեց. «Եթե մենք 2 տարի առաջ քշեինք այս թուրքերին մեր երկրից, հիմա մենք այստեղ դատարանի շուրջ հավաքված չէինք լինի, Արմեն Աշոտյանին չէինք սատարի, եթե հիմա քշենք, ապա մի տարի հետո չենք հավաքվի: Այս ամսվա 30-ին էլ իմ վճիռն է, ենթադրում եմ, որ նույն ճանապարհով էլ ես եմ գնալու»:

«Վետո» շարժման ղեկավարը հայտնեց, որ ցանկանում է այդ փակ շղթան կոտրել և երբ իրեն բանտարկեն՝ իր ընկերներին խնդրելու է, որ իրեն չսատարեն, իսկ եթե ուզում են սատարեն, ապա թող դուրս գան փողոց և թուրքերին քշեն իշխանությունից: