Ձեր վստահելի աղբյուրը

«Արմեն Աշոտյանի այսօրվա ձերբակալումն ու շարունակվող դատական պրոցեսը, որը, ենթադրաբար, կավարտվի կալանքով, Նիկոլի ու իր հետևոդների կողմից հերթական շոու ծրագրի մեկ մասն է, բաղկացուցիչը»,- հակակոռուպցիոն դատարան դիմաց լրագրողների հետ զրույցում ասաց Վահե Հակոբյանը։

Նա համոզված է, որ այս շոուներով փորձում են շեղել հանրության ուշադրությունը, ու քանի դեռ մեր հանրությունը շարունակում է խուլ ու համր մնալ այս կատարող իրավիճակներին,  այդքան Նիկոլ Փաշինյանի մոտ մասամբ կստացվի իր շոուի ծրագրերի իրականացումը։

Վահե Հակոբյանը նշեց, որ Նիկոլ Փաշինյանը թուրք-ադրբեջանական ճնշման տակ շարունակաբար զիջումների է գնում։

Քաղաքական գործիչն ասաց, որ Սյունիքն այսօր գտնվում է  բոլոր գերտերությունների կիզակետում որպես խաչմերուկ, ու կոմունիկացիաների բացումը բոլորի հետաքրքրության շրջանակում է։ Նա պատահական չի համարում Սյունիքում Իրանի  հյուպատոսության բացումը, որին հաջորդում է ՌԴ-ի հյուպատոսության բացումը։

«Այլ պետությունների  դեսպանները օր ու գիշեր գտնվում են Սյունիքում, մնում է այնտեղ գրասենյակներ բացեն։

Փաստն այն է, որ Սյունիքը բոլորի հետաքրքրության կենտրոնում է  որպես խաչմերուկ»,- ասաց Վահե Հակոբյանը։

Նա ընդդիմության՝ խորհրդարանական ու արտախորհրդարանական, աշխատանքը զրո է գնահատում։

«Մենք ինչ ենք անում։ Ակնհայտ է, որ փողոցային  պայքարը չստացվեց։ Մենք հիմա փնտրում ենք այլ ճանապարհներ, այլ եղանակներ։  Տարբերակներ կան, շուտով կհրապարակենք, կբարձրաձայնենք այն ամենի մասին, ինչ արդեն գեներացրել ենք»,- ասաց ԱԺ «Հայաստան» խմբակցության նախկին պատգամավորը։

Նա նշեց, որ Երևանի քաղաքապետի ընտրությունները չի համարում պայքարի ձև։

Հիշեցնենք, որ ՀՀԿ փոխնախագահ Արմեն Աշոտյանը ձերբակալվել է այսօր, ՔԿ հաղորդմամբ՝ խափանման միջոցի պայմանները խախտելու համար։ ՀՀ հակակոռուպցիոն դատարանում, դատավոր Սարգիս Դադոյանի նախագահությամբ, քննարկում է ՀՀԿ փոխնախագահ Արմեն Աշոտյանի  կալանքի միջնորդությունը։