Ձեր վստահելի աղբյուրը

Սոցցանցերում շատ գործիչներ, օգտատերեր, փորձագետներ, իրավապաշտպաններ արձագանքում են ՀՀԿ փոխնախագահ Արմեն Աշոտյանի ձերբակալությանը։

Ֆինանսների նախկին նախարար Վարդան Արամյանը գրում է.

«Արմենին ճանաչում եմ շատ վաղուց և չեմ կարող չասել․
Չմտածես, ամեն բան կյանքում տանելի է, անտանելի է միայն ոչ արժանապատիվ
ապրելը»։

Քաղտեխնոլոգ Կարեն Քոչարյանը գրում է. 

«Աշոտյան Արմենը ոչ այսօրվա իշխանավորների նման դղյակներ ունի, ոչ զրահապատ թանկարժեք ավտոմեքենաներ, ոչ էլ միլիոնավոր դոլարներ ու եվրոներ: Արմեն Աշոտյանը կրիմինալ չէ և թմրամոլ չէ: Արմեն Աշոտյանը դասական ՔԱՂԲԱՆՏԱՐԿՅԱԼ Է»։

Իրավապաշտպան Ռուբեն Մելիքյանը գրում է. 

«Ընդդիմադիր խորհրդարանական կուսակցության փոխնախագահին ձերբակալել են շուրջ 2-3 ժամ առաջ։ Վաղուց իրականացվող քրեական վարույթով։ Այն նույն վարույթով, որով Աշոտյանը տևական ժամանակ է՝ ինչ ունի մեղադրյալի կարգավիճակ, նրա նկատմամբ կիրառված է խափանման միջոց։
Եվ ի՞նչ։ Այս պահին միակ պարզաբանումն այն է, որ Աշոտյանն իբր խախտել է խափանման միջոցի պայմանները։ Դա խիստ անբավարար պարզաբանում է։ Ի՞նչ է արել Աշոտյանը՝ փորձել է ապօրինի հեռանա՞լ երկրից։ Բնականաբար ոչ։ Հրավիրել են քննիչի մոտ՝ չի՞ ներկայացել։ Ուղղակի բացառում եմ։ Բա ի՞նչ է արել։ Ի՞նչն է խախտել։
Այս հարցերն իհարկե հռետորական են։ Բոլորին է պարզ, որ Աշոտյանին մեկուսացնելու պատճառներն ամենևին քրեական դատավարության տիրույթում չեն»։

ԱԺ նախկին փոխնախագահ Արա Սահակյանը գրում է. «Աշոտյանը քաղկալանավոր է»։

ՀՀԿ ԵՄ նախագահ Հենրիխ Դանիելյանը գրում է. 

«Ով մտածում է, թե կարող է մեզ լռեցնել, ասեմ, որ հնարավոր չէ։
Կողքիդ ենք, Աշոտյան ջան»։

«Քաղաքացիական գիտակցություն» ՀԿ նախագահ Նարեկ Սամսոնյանը գրում է. 

«Ինչքան ավելացնեք քաղբանտարկյալների թիվը էդքան ավելի ցավոտ վերջաբան եք ունենալու: Ձեզանից վախեցող չկա, ձեզանից փախնող չկա, լրիվ հակառակը՝ դուք եք վախեցած, դուք եք փորձելու փախնել:
Արմեն Աշոտյանի ձերբակալումը դավաճանական ռեժիմի վախերի հերթական դրսևորումն է: Աշոտյանը դասական քաղբանտարկյալ է դառնում, բայց հաստատ երկար չի տևելու էս վակխանալիան»։

Լրագրող Հռիփսիմե Առաքելյանը հրապարակել է անցած տարի Ստեփանակերտում արված լուսանկարն ու գրել. «Հարազատ ընկեր ջան` հետդ ենք,սատարում ենք,քեզ շատ սիրում ենք։Ինչ էլ լինի մեկա ես վստահ եմ` Հայկը հաղթելու է ոսոխ Բելին»։