Ձեր վստահելի աղբյուրը

«Իշխանությունը հետևողականորեն իրականացնում են այն ծրագիրը, որով եկել է իշխանության»,- հակակոռուպցիոն դատարանի դիմաց լրագրողների հետ զրույցում ասաց քաղաքագետ Հրանտ Մելիք-Շահնազարյանը։ 

Ըստ նրա, այդ ծրագիրը իրականացնելը ենթադրում է առաջինը՝ զիջումներ թուրք-ադրբեջանական դաշինքին, երկրորդ՝ դիմադրության համատապասխան օջախների չեզոքացում ՀՀ ներսում։

«Արմեն Աշոտյանը այն քաղաքական գործիչն է, ով մշտապես առաջինն է մեկնաբանում, թե ինչ տեղի ունենում արտաքին քաղաքականության մեջ, կարելի է ասել նաև ուղղություն է տվել ընդդիմադիր դաշտին, հայրենասեր հատվածին, թե ինչպես պետք է պաշտպանել Հայաստանի շահը, որտեղից է բխում իրական սպառնալիքները։ Ահա նման մարդուն ազատազրկելով, ըստ էության, նա փորձում է  դիմադրության օջախները զրկել  հերթական ուղենիշներից, ուղղություն ցույց տվող գործիչներից»,- ասաց Հ. Մելիք Շահնազարյանը։

Նա նշեց, որ Նիկոլ Փաշինյանն ունի արևմտյան, նաև թուրք-ադրբեջանական իր հովանավորների աջակցությունը՝ նման վարքագիծ դրսևորելու համար, հետևաբար, այդ քայլերով գնում է։

«Տեսեք՝ ինչ է տեղի ունենում․ այսօր ձերբակալում են Արմեն Աշոտյանին, որի դերակատարությունն արդեն շեշտեցի, և ԱԺ-ում վարչապետ կոչվածն ասում է, թե մեր սխալն այն է եղել, որ վստահել ենք բանակին։ Եվ դա ասում է այն պահին, երբ սահմանին լարված է, թշնամին այսօր մուտք է գործել Հայաստանի տարածք։ Ահա այսպիսի ուղերձներ է նա տալիս, դրա համար էլ արժանանում է էրդողանների, ալիևների գովասանքին, ինչին ականատես եղանք երկու օր առաջ»,- ասաց Հրանտ Մելիք-Շահնազարյանը։

Ըստ քաղաքագետի, պայքարողներին ճնշելու նրանց ռեսուրսները սպառվում են. «Վերջին ճիգերն են գործադրում։ Մենք պետք է հաղթահարենք նաև այս փուլը, դրանից հետո, համոզված եմ, ունենալու ենք լուրջ վերականգնման ռեսուրս, ինչո՞ւ չէ՝ նաև հաղթանակներ»։

Նա նշեց, որ իր սպասելիքը հանրության գիտակից հատվածից է, որ պետք է ի վերջո դուրս գա ու պայքարի սեփական երկրի համար։

«Սա Աշոտյանի հարց չէ, Հայաստանի լինել չլինելու հարցն է»,- ասաց Հրանտ Մելիք-Շահնազարյանը։