Ձեր վստահելի աղբյուրը

«Ժողովուրդ» թերթը գրում է.

««Ժողովուրդ» օրաթերթի տեղեկությունների համաձայն՝ ՀՀ քննչական կոմիտեի քննչական բաժնում քրեական գործ կա, որով անցնում են ԱԺ նախկին պատգամավոր Մելիք Մանուկյանը՝ Շշի Մելոն, և քրեական աշխարհի ներկայացուցիչ Ազատանցի Պետոն:

Այդ քրեական գործով շոշափվում են շատ պաշտոնյաների, այդ թվում՝ Արցախի պաշտպանության նախարարի նախկին տեղակալ Սամվել Կարապետյանի (Օգանովսկու) և այլ անձանց անունները, որոնց կանդրադառնանք առաջիկայում:
Քրեական գործի թեման այն է, որ Շշի Մելոն և այլ պաշտոնյաներ գործարանի համար պահանջվող հումքը իրենց մատնանշած ընկերությունից վերցնելու համար հարց ու պատասխան են ունեցել միմյանց հետ: Ի դեպ, Ազատանցի Պետոն Օշականցի Գևորիկի և «օրենքով գող» Զապի մտերիմ ընկերն է, ինչպես նաև գերենալ Օգանովսկու սանիկը:

Նշենք, որ 2021թվականին Նիկոլ Փաշինյանն էկոնոմիկայի նախարարի պաշտոնակատար Վահան Քերոբյանի ուղեկցությամբ այցելել էր Կոտայքի մարզում գործող «Սարանիստ» ընկերություն, որը զբաղվում է ապակիների արտադրությամբ, իսկ բոլորովին վերջերս էլ սկսել է գործել կոնյակի գործարանը: Սա հենց նույն Մելիք Մանուկյանի գործարանն է:

Նկատենք, որ Նիկոլ Փաշինյանի իշխանության և Մելիք Մանուկյանի հարաբերությունների «ջերմացումը», ըստ էության, սկսվեց 2019-ի ամառվա դեպքերից հետո, երբ պայթեցվեց Մելոյի մեքենան, ապա եղբայրը՝ Ռոբերտ Մանուկյանը, փորձեց այդ մեքենան դեպքի վայրից տեղափոխել։ Երբ նրան բերման էին ենթարկել, 6 ոստիկանի էր ծեծի ենթարկել։

Ռոբերտ Մանուկյանին մեղադրանք էր առաջադրվել իշխանության ներկայացուցչի նկատմամբ բռնություն գործադրելու հոդվածով։ Նրան ձերբակալել էին, ապա մի քանի օրից բաց թողել, և հետագայում այդ բոլորը գործերը փակել էին։

Դրանից հետո Շշի Մելոն դարձավ իշխանությունների «սրտի գործարարը» և սկսեց աշխատել նրանց համար: Այս ամենին զուգահեռ՝ իշխանությունները քրեական գործ ունեն Մելոյի և նախկին պաշտոնյաների մասով, որոնք չեն փակում և որպես մահակ պահում են նրանց գլխին, որպեսզի հարկ եղած դեպքում այն օգտագործեն և վերահսկեն գործարարին»։

Մանրամասները թերթի այսօրվա համարում