Ձեր վստահելի աղբյուրը

Բարձրագույն դատական խորհրդի նիստում Վճռաբեկ դատարանի քաղաքացիական պալատի դատավոր Տիգրան Պետրոսյանը ԲԴԽ նախագահ Կարեն Անդրեսայանին ինքնաբացարկ հայտնելու երկու միջնորդության ներկայացրեց։

Հիշեցնենք, որ Բարձրագույն դատական խորհրդի նիստում քննարկվում է Սնանկության դատարանի դատավոր Սամվել Թադևոսյանին, Վերաքննիչ քաղաքացիական դատարանի դատավոր Աստղիկ Խառատյանին, Վճռաբեկ դատարանի քաղաքացիական պալատի դատավորներ Արտակ Բարսեղյանի և Տիգրան Պետրոսյանին կարգապահական պատասխանատվության ենթարկելու հարցի վերաբերյալ արդարադատության նախարարի պարտականությունները կարող  Լևոն Բալյանի միջնորդությունը։

Վարույթի հիմքում ՄԻԵԴ վճիռներից մեկն է. նախարարը միջնորդել է դատավորներին պատժել 2009 թվականին, այսինքն՝ 14 տարի առաջ կայացված դատական ակտերի համար՝««Շոլց ԱԳ» ընկերությունն ընդդեմ Հայաստանի» 2019թ հունվարի 24-ին հրապարակված ՄԻԵԴ վճռի հիման վրա։

Տ. Պետրոսյանն այսօր արդեն մեկ միջնորդություն ներկայացրել էր՝ առաջարկելով  ԲԴԽ նախագահ Կարեն Անդրեսայանին ինքնաբացարկի միջնորդություն ներկայացնել։ Սական այն մերժվել էր։

Երկրորդ միջնորդության հիմքում դատավորը դրել է «Կարեն Անդրեսայանի մոտ ձևավորված կանխակալ վերաբերմունքն իր նկատմամբ»։

Նա նաև նշեց. «Դատավորի վարքագծի կանոնները ձեզ պարտավորցնում է հանդես բերել զսպվածություն և զերծ մնալ այդ մասին հրապարակայնորեն արտահայտվելուց։ Դուք ձեր վարքագծով զերծ չեք մնացել դատական  իշխանությունը վարկաբեկող, այդ իշխանության անկախության և անչառության վերաբերյալ  հանրության վստահությունը նվազեցնող վարքագիծ դրսևորելուց, հրապարակայնորեն կասկածի տակ եք առել ՀՀ բարձրագույն դատական ատյանի դատավորների գործողությունները և դատական ակտերը՝ չդրսևորելով քաղաքական զսպվածություն և չեզոքություն, ընդ որում, դուք ըստ էությամբ, քաղաքական գործունեությամբ զբաղվում եք ձեր դատավորական լիազորություններն անմիջականորեն իրականացնելիս»։

Բարձրագույն դատական խորհուրդը մերժեց նաև այս երկու միջնորդությունները։