Ձեր վստահելի աղբյուրը

«Մենք ունենք վարկած, թե ինչ օպերացիա էր կազմակերպվել պրոդյուսեր Արմեն Գրիգորյանի գլխին, որի մասին ավելի ուշ կխոսենք, քանի որ հիմա նպատակահարմար չենք համարում դրա մասին բարձրաձայնելը»,-դատական նսիտից հետո, որի ժամանակ հարցաքննվել են վերջին վկաները, հայտնեց փաստաբան Ռուբեն Մելիքյանը: 

Նա ասաց, որ պաշտպանական կողմի մոտ հարցեր կան, թե ինչու Գրիգորյանի՝ 2021 թվականի ապրիլին բազմաթիվ եթերներից հնչած խոսքը միանգամից բոլորը լսեցին 2022 թվականի մայիսին:

Մելիքյանը հայտնեց, որ գործով վկայի հարցաքննությունից պարզվել է, որ ինչ-որ մարդիկ որոշել են, որ պետք է գնան Գյումրու մի վայր, որտեղ պետք է լիներ Արմեն Գրիգորյանը, և հարց հնչեցրեց, թե որտեղի՞ց նրանց նման տեղեկատվություն և ո՞վ էր նրանց ուղղորդել:

Փաստաբանը հայտնեց, որ դեռ պետք է պարզվի, թե ով էր ուղղորդել տեսանյութի տարածումը և դրան ուղեկցած մեկնաբանությունը և հավելեց, որ այդ ամենը Գրիգորյանի շահերի պաշտպանող կողմի համար որոշակի վարկածի հիմք է հանդիսանում:

«Արդարության կարևոր էլեմենտը հրապարակայնությունն է, մեկ մայլ վարույթով հենց այս պահին լրջագույն հիմնահարց է գրանցվում՝ խախտվում է  դատավորի հրապարակայնության իրավունքը ԲԴԽ-ում»,-անդրադառնալով արդար դատավարության ակնկալիքի վերաբերյալ հարցին՝ հայտնեց փաստաբանը և նկատեց, որ պրոդյուսեր Արմեն Գրիգորյանի դատավարությունը բաց է, լրագրողներն էլ են ներկա և  հարցաքննվողները հանրության առաջ էլ են պատասխանատու, իրենց խղճի առաջ էլ:

«Մենք փորձել և փորձում ենք հարցադրումներ տալու միջոցով հերքել մեղադրող կողմի վարկածը և ամրացնել մեր համոզմունքը մեր վարկածի հետ կապված, որի մասին այս պահին չեմ նախընտրում խոսել մանրամասնությամբ»,-հայտնեց Ռուբեն Մելիքյանը՝ հավելելով, որ շատ բաներում լավատես չեն, բայց բաներ կան, որոնք հիմք են տալու հետագայում այս ամենին նոր աչքերով նայելու և արձանագրեց, թե այդ հետագան գալու է:

Մելիքյանը տեղեկացրեց, որ վկան հայտարարել , թե Արթիկից հասել է Գյումրի, որպեսզի Արմեն Գրիգորյանին հարցեր տա հնչեցրած որակումների վերաբերյալ, բայց մյուս կողմից էլ, ըստ փաստաբանի, վկան իրեն նեղություն չի տվել վերցնելու ամբողջ խոսքի ձայնագրությունը և համոզվել, որ Գրիգորյանը քաղաքական համատեքստում է հայտարարություններ և որակումներ արել::