Ձեր վստահելի աղբյուրը

ՀՀ արտաքին գործերի նախարար  Արարատ Միրզոյանը հունիսի 5-ին հայտարարել էր. «Մենք ԼՂ ժողովրդի կողմից մանդատ չենք ստացել՝ իրենց ապագան բանակցելու համար, ըստ այդմ, մենք իրավունք չունենք որոշել նրանց կարգավիճակը, մենք այդպիսի հավակնություն չենք ներկայացրել և չենք էլ փորձում այդպիսի բան անել»:

Panorama.am-ը հունիսի 9-ին  Միրզոյանի այս հարտարարության հետ կապված գրավոր մի քանի հարց ուղղեց ՀՀ կառավարությանը, ՀՀ արտաքին գործերի նախարարությանը։

Հարց 1. ՀՀ ԱԳ նախարարն ու ՀՀ  իշխանությունները ԼՂ ժողովրդից ստացած այդ ո՞ր մանդատով են Արցախը Ադրբեջանի մաս ճանաչում:

Հարց 2. Երբ ՀՀ վարչապետը Ստեփանակերտի հրապարակի հարթակից հայտարարում էր «Արցախը Հայաստան է և վերջ»,  ո՞ւմից էր ստացել այդ մանդատը:

Հարց  3. Որո՞նք են այն պատճառներ, որ ՀՀ իշխանությունը պաշտպանում է Ադրբեջանի շահը ճանաչելով այդ երկրի տարածքային ամբողջականությունը՝ ներառյալ Արցախը, բայց հրաժարվում է պաշտպանել արցախահայության շահերը՝ հայտարարելով, թե այդպիսի «մանդատ» և «հավակնություններ» չունեն:

Կառավարությունից պատասխանեցին. «Ձեր հարցումը վերահասցեագրվել է Արտաքին գործերի նախարարություն, որտեղից էլ կստանաք պատասխանը»։

Արտաքին գործերի նախարարությունից պատասխանեցին. «Ձեր կողմից բարձրացված հարցադրումների վերաբերյալ Հայաստանի Հանրապետության դիրքորոշումները հանրային կերպով բազմիցս հնչեցվել են բարձր և բարձրագույն մակարդակով»։

2018 թվականից Նիկոլ Փաշինյանը պարբերաբար հայտարարում էր, որ ինքը Արցախի Հանրապետությունից և նրա ժողովրդից մանդատ չունի՝ լուծելու ԼՂ խնդիրը և որոշելու արցախցիների ճակատագիրը:

«Արցախի Հանրապետության անունից կարող է խոսել Արցախի Հանրապետության իշխանությունը, ինչպես Հայաստանի Հանրապետության անունից կարող է խոսել Հայաստանի Հանրապետության իշխանությունը: Հայաստանի Հանրապետությունը նույնպես հակամարտության կողմ է, և ինքը լիարժեք կխոսի իր անունից: Արցախի Հանրապետության անունից պետք է խոսի Արցախի Հանրապետության իշխանությունը»,- ասել է Փաշինյանը (2018թ. մայիսին Ստեփանակերտ):

Արդյո՞ք Փաշինյանը հավատարիմ մնաց իր հայտարարություններին։ Ապացույցը՝ 2020 թվականի 44-օրյա պատերազմը, դրան հաջորդած իրադարձությունները, գրավոր ու բանավոր համաձայնությունների արդունքում նոր զիջումները Ադրբեջանին  ու այսօրվա իրավիճակը։