Ինչ փոփոխություններն են իրականացվել Արցախից տեղահանվածների բնակարանային ապահովման ծրագրում
ՀՀ կառավարությունը հաստատել է Արցախի Հանրապետության առանձին շրջաններից տեղահանված ընտանիքների բնակարանային մատչելիության ապահովման պետական աջակցության ծրագրում փոփոխությունները, որոնց հիմնական նպատակն է առավել բարենպաստ պայմաններ ապահովել շահառուների համար։ Այսօր լրագրողների հետ հանդիպմանն ասաց ԱՍՀՆ կառուցվածքային ստորաբաժանումների առանձին գործառույթներ համակարգող խորհրդական Գայանե Ղարագյոզյանը։
Նա հիշեցրեց, որ ծրագիրը գործում է 2022 թ-ից։
Նրա խոսքով՝ Արցախից տեղահանված այն ընտանիքները, որոնք բավարարում են ծրագրով սահմանված չափանիշներին և ստացել են հավաստագրեր, հիփոթեքային վարկավորմամբ կարողանում են ձեռք բերել անշարժ գույք կամ կառուցել սեփական տուն։ Ըստ նրա՝ ծրագրի շրջանակում հիփոթեքային վարկի ամսական մարումներն առնվազն 10 տարիների կտրվածքով իրականացնում է պետությունն՝ ինչպես մայր գումարի, այնպես էլ տոկոսագումարի գծով։
«Վերջին շրջանում իրականացված ուսումնասիրությունները ցույց տվեցին, որ առկա են խոչընդոտներ, որոնք խանգարում են շահառումներին իրացնել իրենց հավաստագրերը, այդ թվում՝ կանխավճարի բացակայությունը, գումարի չափը։ Ուստի որոշում կայացվեց ծրագրում որոշ փոփոխություններ իրականացնել»,- ընդգծեց Գայանե Ղարագյոզյանը։
Այսպիսով, այդ փոփոխություններից են՝
- հավաստագրերի գործողության ժամկետը երկարաձգվել է մինչև 2024 թ․ հուլիսի 1-ը՝ անկախ նրանից, թե այն երբ է տրամադրվել շահառուներին,
- ծրագրին առցանց դիմելու ժամկետը երկարաձգվել է մինչև 2023 թվականի հունիսի 30-ը,
- նվազեցվել է պահանջվող կանխավճարի չափը՝ 5 տոկոսից դառնալով 2,5 տոկոս, իսկ առնվազն 4 անչափահաս երեխա ունեցող, ինչպես նաև բացառապես կենսաթոշակային տարիքի շահառուներից կազմված ընտանիքների համար՝ 1 տոկոս,
- ուժը կորցրած է ճանաչվել այն պայմանը, համաձայն որի՝ շահառուի դիմելու օրվա դրությամբ վերջին 12 ամիսների ընթացքում ձեռք բերվող անշարժ գույքը չպետք է օտարված լինի,
- սահմանվել են արտոնություններ այն ընտանիքների համար, ովքեր հավաստագրի միջոցով անշարժ գույք ձեռք կբերեն կամ անհատական բնակելի տուն կկառուցեն այն գյուղական ոչ սահմանամերձ բնակավայրերում, որտեղ պետական և սուբվենցիոն ծրագրերի շրջանակում արդեն իսկ կառուցված են և/կամ ներկայումս հիմնանորոգվում կամ կառուցվում են դպրոցներ, մանկապարտեզներ։ Այս դեպքում աջակցության չափը կկազմի 12 մլն դրամ՝ նախկին 10 մլն դրամի փոխարեն (ՀՀ առանձին գյուղական բնակավայրերի ցանկն՝ այստեղ)
- հստակեցվում է, որ ծնողների հետ միևնույն հասցեում բնակված՝ ամուսնացած կամ ամուսնալուծված զավակի ընտանիքը որպես առանձին շահառու կարող է դիտարկվել միայն այն դեպքում, եթե այդ ընտանիքին սեփականության իրավունքով պատկանել է մեկ այլ բնակելի անշարժ գույք Արցախի Հանրապետության այն շրջանում, որտեղ բնակվել է այդ ընտանիքը։
Գայանե Ղարագյոզյանը նաև նշեց, որ եթե շահառուն ունի վատ վարկային պատմություն և չի կարողանում իրացնել բնակարան ձեռք բերելու համար ստացված հավաստագիրը, ապա նոր փոփոխության համաձայն՝ այդ ընտանիքի անդամը, որը բանկում խնդիր ունի, կարող է «դուրս գալ» հավաստագրից, և ընտանիքի մյուս անդամներն անխոչընդոտ կկարողանան իրացնել հավաստագիրը։
Նախարարության ներկայացուցիչը հայտնեց, որ մինչ օրս ծրագրի շրջանակում հավաստագիր է ստացել 3612 շահառու, որից շուրջ 820 ընտանիքն արդեն իսկ ավարտել է հիփոթեքային վարկավորման գործընթացը։
Նրա խոսքով՝ առավել շատ բնակարաններ ձեռք են բերել Արարատի մարզում, դրան հաջորդում է Կոտայքի մարզը, այնուհետև՝ Սյունիքը։
Լրահոս
Տեսանյութեր
Ուզում են երկիրը Հյուսիսային Կորեա սարքեն, մենք էլ դառնանք իրենց համբալները. Բողոքի ակցիա
