Ձեր վստահելի աղբյուրը

«Մենք մինչև օգոստոսի 19-ը ժամանակ ունենք հավաքելու  50 հազար ստորագրություն։  Հետո մենք դա կներկայացնենք Ազգային ժողով։ Դրանից հետո, կախված նրանից, թե ինչ պրոցես կընթանա, կարծում եմ, կարող է ազդել իրադարձությունների հիմնական ընթացքի վրա»,- «Ինչքա՞ն ժամանակ ունենք» քննարկմանն ասաց «ՀայաՔվե»  նախաձեռնող խմբի անդամ Մենուա Սողոմոնյանը։

Նա նշեց, որ իրենք քարոզարշավ են իրականացնելու, ունենալու են բակային հանդիպումներ։

«Այս ամեն ինչը ստեղծում է  նաև աղմուկ, համախմբում, որն, անկասկած, միտված է մեր ծրագիր մինիմումին՝ հակաարցախյան փաստաթղթի ստորագրության կանխումը հանրային քաղաքացիական դիմադրություն ստեղծելով»,-ասաց Սողոմոնյանը։ 

Նրա խոսքով, «ՀայաՔվե»-ի ստորագրությանը մասնակցած անձը պետք է ցուցաբերի նախաձեռնողականություն, այսինքն չսահմանափակվի միայն իր ստորագրությամբ, այլ իրազեկի իր հարազատներին, մարդկանց բերի այս գաղափարի շուրջ։

Մենուա Սողոմոնյանի ներկայացմամբ, «ՀայաՔվե»-ն քաղաքացիական օրենսդրական նախաձեռնություն է, որի նպատակն է  Հայաստանի Քրեական օրենսգրքում երկու կետ ավելացնել.  առաջին՝ ՀՀ անունից  հանդես եկող պետական պաշտոնյան, ով  իր գործողությամբ  Արցախը կճանաչի որևէ այլ պետության կազմում, տվյալ պարագայում,  բնականաբար, նկատի ունենալով Ադրբեջանը, պատժվում է 10-15  տարվա ազատազրկման, երկրորդ՝ ՀՀ անունից հանդես եկող պետական պաշտոնյան, ով իր  հայտարարությամբ, իր այլ գործողություններով կժխտի Հայոց ցեղասպանության  իրողությունը կամ կնսեմացնի դրա պատմական նշանակությունն ու  վտանգավորությունը, ևս պատժվում է 10-15 տարվա ազատազրկման։

«Սա Հայաստանի երրորդ հանրապետության մեջ առաջին անգամ է, երբ քաղաքացիներն իրենք են օրենք ստեղծում կամ գործող օրենքում փոփոխություն են իրականացնում։ Շատ կարևոր է, որ այս գործողությունը կոնկրետ կապված է 120 հազար մարդու փրկության, 120 հազար մարդու ճակատագրի հետ, մեր հայրենիքի այդ կարևոր հատվածը պահպանելու հետ»,- ասաց նա։

Նա տեղեկացրեց, որ Սահմանադրությունն ու Հանրաքվեի մասին օրենքը հնարավորություն է  տալիս, որպեսզի իրենց առաջարկությունը մտնի ԱԺ ու քննարկվի, առաջին փուլում անհրաժեշտ է հավաքել 50 հազար ստորագրություն։  Նա հայտնեց,  որ մոտ օրերս կհայտարարեն ու կսկսվի առաջին փուլը։

««ՀայաՔվե»-ն փոխլրացնող նախաձեռնություն է, ոչ մի կերպ չի հակադրվում մյուս շարժումներին ու կուսակցություններին, նրանք, ովքեր ուզում են քաղաքացիական ֆորմատով պայքարել, չեն ուզում մտնել ինչ-որ կուսակցության կազմ, հենց այդ առումով «ՀայաՔվե»-ն օգտակար է»,- ասաց Մենուա Սողոմոնյանը՝ հավելելով, որ եթե մարդ ստորագրում է, նշանակում է՝  նա վճռական է, պատրաստ է տեր կանգնելու իր ստորագրությանը։